نئی دہلی،14 جنوری (یواین آئی ) ڈنمارک سے تعلق رکھنے والے دنیا کے تیسرے نمبر کے بہترین بیڈمنٹن کھلاڑی اینڈرز اینٹونسن (Anders Antonsen) نے نئی دہلی میں خطرناک فضائی آلودگی” کو جواز بنا کر مسلسل تیسرے سال انڈیا اوپن سے نام واپس لے لیا ہے۔اینٹونسن نے اپنی انسٹاگرام اسٹوری کے ذریعے مداحوں کو اس فیصلے سے آگاہ کیا۔ انہوں نے دہلی کی ہوا کے معیار (AQI) کا ایک اسکرین شاٹ بھی شیئر کیا، جس میں انڈیکس 348 دکھایا گیا تھا، جو انسانی صحت کے لیے انتہائی مضر ہے۔اینٹونسن نے کہا”دہلی میں اس وقت آلودگی کی جو صورتحال ہے، میرے خیال میں یہ بیڈمنٹن ٹورنامنٹ منعقد کرنے کے لیے موزوں جگہ نہیں ہے۔ انہوں نے امید ظاہر کی کہ گرمیوں تک حالات بہتر ہو جائیں گے تب اسی شہر میں ورلڈ چیمپئن شپ کا انعقاد ہونا ہے۔اینٹونسن نے انکشاف کیا کہ بیڈمنٹن ورلڈ فیڈریشن (BWF) نے ایونٹ سے دستبردار ہونے پر ان پر 5,000 امریکی ڈالر کا جرمانہ عائد کیا ہے۔ اس پر اینڈر اینٹونسن نے کہا کہ صحت سے متعلق سنگین خدشات کے باوجود مجھے جرمانے کی صورت میں سزا دی گئی ہے، جو کہ افسوسناک ہے۔اینڈر اینٹونسن جیسے بڑے کھلاڑی کے دستبردار ہونے سے BWF سپر 750 ٹورنامنٹ کی چمک مدھم پڑنے کا خدشہ ہے۔ دہلی میں فضائی آلودگی ایک طویل عرصے سے بین الاقوامی کھلاڑیوں کے لیے پریشانی کا باعث بنی ہوئی ہے، اور اب یہ بڑے ٹورنامنٹس کے انعقاد پر بھی سوالیہ نشان کھڑے کر رہی ہے۔
