نئی دہلی (یو این آئی) سابق ہندوستانی کرکٹر اور ترنمول کانگریس (ٹی ایم سی) کے رکن پارلیمنٹ کیرتی آزاد کی اہلیہ پونم آزاد کا پیر کو انتقال ہوگیا۔ وہ گزشتہ کئی برسوں سے شدید بیمار تھیں۔ مسٹر آزاد نے آج سوشل میڈیا پلیٹ فارم پر یہ اطلاع دی۔ انہوں نے پوسٹ میں لکھا، “میری بیوی پونم اب نہیں رہیں۔ ان کا انتقال آج رات 12:40 بجے ہوا۔ تعزیت کے لیے آپ سب کا شکریہ۔ ان کی آخری رسومات شام 4 بجے دامودر ویلی شمشان گھاٹ میں ادا کی جائیں گی۔ انہیں درگا پور کی یہ جگہ بہت پسند تھی۔
مسز آزاد نے اپنے شوہر کے ساتھ وہیل چیئر پر بیٹھ کر کئی بار لوک سبھا انتخابی مہم میں حصہ لیا تھا۔ حال ہی میں انہیں مسٹر آزاد کے ساتھ کئی بار پروگراموں میں بھی دیکھا گیا۔ مغربی بنگال کی وزیر اعلیٰ ممتا بنرجی نے کیرتی آزاد کی اہلیہ کے انتقال پر تعزیت کا اظہار کیا ہے۔ انہوں نے اپنے تعزیتی پیغام میں لکھا یہ معلوم ہونے پر دکھ ہوا کہ ہمارے ایم پی اور کرکٹ ورلڈ کپ جیتنے والی فاتح ٹیم کے رکن کیرتی آزاد کی اہلیہ نے آخری سانس لی ہے ، میں پونم کو کافی عرصے سے جانتی تھی۔ مجھے یہ بھی معلوم تھا کہ وہ پچھلے کچھ برسوں سے شدید بیمار تھیں۔ کیرتی اور کنبہ کے دیگر افراد نے اپنی طرف سے پوری کوشش کی اور آخری سانس تک ان کے ساتھ رہے۔ کیرتی اور کنبہ کے دیگر افراد سے میری تعزیت۔ ان کی روح کو سکون ملے۔”
