واشنگٹن، (یو این آئی) امریکہ میں سردیوں کے طوفان سے ہلاکتیں 70 سے زیادہ ہوگئی ہیں، وسطی اور مشرقی علاقوں میں سردی کی شدید لہر برقرار ہے۔
این بی سی کے مطابق امریکہ کے مشرقی علاقوں میں لوگ اس ہفتے کے آخر میں سردیوں کے ایک اور طوفان کے خطرے کے پیشِ نظر تیاری کر رہے ہیں، جب کہ بدھ کے روز بھی ملک کے بڑے حصے گزشتہ ہفتے کے ہلاکت خیز طوفان کے نتیجے میں برف باری اور شدید سردی کا سامنا کر رہے تھے۔
گزشتہ ہفتے ملک بھر میں آنے والے شدید موسمِ سرما کے طوفان کے باعث کم از کم 73 افراد ہلاک ہوچکے ہیں، جن میں ٹیکساس میں برف پر سے پھسل کر پانی میں گرنے کے بعد ڈوبنے والے 3 بچے بھی شامل ہیں۔
اس طوفان نے اپنے پیچھے برف اور جما دینے والی سردی چھوڑی ہے، جب کہ ملک کے بعض حصوں پر شدید ٹھنڈ کا راج رہا۔ بدھ کی دوپہر تک 6 کروڑ 90 لاکھ افراد انتہائی سرد موسم کے گھیرے میں تھے، مشرقی علاقوں میں یہ شدید سردی آئندہ ہفتے تک برقرار رہنے کی توقع ہے۔
شکاگو میں بدھ کی صبح ہواؤں کے باعث درجۂ حرارت منفی 14 فارن ہائیٹ محسوس کیا گیا۔ کلیولینڈ میں یہ منفی 11، نیویارک سٹی میں 15، ٹینیسی کے شہر نیش وِل میں 19 اور ڈیلاس میں 22 فارن ہائیٹ محسوس ہوا۔ اسی دوران ٹینیسی اور مسیسیپی دونوں ریاستوں میں ایک لاکھ سے زائد صارفین بجلی سے محروم رہے۔
مشرقی کینیڈا کے اوپر کم دباؤ کا ایک گہرا نظام بن گیا ہے، جو قطبی ہوا کو براہِ راست امریکا کے شمال مشرقی اور وسطی علاقوں کی طرف لے آ رہا ہے۔ یہ سرد ہوا آئندہ چند دنوں تک شمال مشرقی اور وسطی بحرِ اوقیانوس کے علاقوں پر چھائی رہے گی، جہاں کئی مقامات پر ہوا کے اثر سے درجۂ حرارت صفر سے بھی نیچے محسوس ہوگا۔
ایک اور کم دباؤ کا نظام جمعہ اور ہفتہ کو جنوب مشرقی علاقوں کو متاثر کرے گا، جس کے نتیجے میں اتوار تک جنوبی ریاستوں کے بعض حصوں میں ہوا کے اثر سے درجۂ حرارت معمول سے کہیں کم محسوس ہوگا۔ میامی میں درجۂ حرارت ایک دہائی سے زائد عرصے میں پہلی بار 40 فارن ہائیٹ سے نیچے جا سکتا ہے۔
یہ سرد ہوا کی لہر بدھ کے روز امریکہ میں موجود سردی سے بھی زیادہ شدید ہوگی اور جمعہ کی صبح سے پیر کی صبح تک تقریباً 80 مقامات پر ریکارڈ کم ترین درجۂ حرارت کا امکان ہے۔ نیشنل ویدر سروس کے مطابق شدید سردی کا یہ دورانیہ گزشتہ کئی دہائیوں میں سب سے طویل ہو سکتا ہے۔
نیویارک سٹی کے دفتر برائے ہنگامی انتظامات نے بدھ کے روز کہا کہ علاقے میں برف باری کا امکان 30 سے 50 فیصد ہے، تاہم اس نے خبردار کیا کہ آئندہ دنوں میں پیش گوئیاں مزید واضح ہوں گی۔ اس کے باوجود، دفتر نے شہریوں پر زور دیا کہ وہ پیشگی تیاری کریں۔
واضح رہے کہ گزشتہ روز امریکی ایئر لائن کی 653 پروازیں منسوخ اور ایک ہزار 77 تاخیر کا شکار ہوئیں، برفانی طوفان کے بعد فضائی سفر بدستور متاثر ہے، امریکی ایئر لائنز نے عملے کو اضافی شفٹس پر ڈبل تنخواہ کی پیشکش کی ہے۔
