نئی دہلی،سماج نیوز سروس: عام آدمی پارٹی نے ملک کی راجدھانی دہلی میں گزشتہ 24 گھنٹوں کے دوران 6 افراد کے قتل پر بی جے پی حکومت پر شدید حملہ کیا ہے۔آپ دہلی پردیش کے صدر سوربھ بھاردواج نے کہا کہ بی جے پی کے راج میں دہلی محفوظ نہیں رہی۔ صرف 24 گھنٹوں میں 6 قتل اس بات کا کھلا ثبوت ہیں۔ ان قتل کی وارداتوں سے عوام میں شدید خوف و دہشت پھیل گئی ہے۔ دہلی میں روزانہ سرِعام قتل ہو رہے ہیں لیکن حکومت کو کوئی فرق نہیں پڑ رہا۔ ایسا محسوس ہوتا ہے جیسے دہلی میں کوئی حکومت موجود ہی نہیں۔انہوں نے کہا کہ دہلی پولیس مرکزی وزیرِ داخلہ کے ماتحت ہے، لیکن وزیرِ داخلہ تشہیری دوروں میں مصروف ہیں اور پولیس کمشنر کسی سے ملنے کو تیار نہیں۔ ایسے میں دہلی کی سیکورٹی خدا کے بھروسے ہے۔ بی جے پی حکومت نے پہلے دہلی کو نشے کی راجدھانی بنایا اور اب یہی نشہ دہلی کو جرائم کی راجدھانی بنا رہا ہے۔منگل کے روز آپ ہیڈکوارٹر میں پریس کانفرنس کرتے ہوئے سوربھ بھاردواج نے کہا کہ دہلی میں گزشتہ 24 گھنٹوں کے اندر 6 قتل ہوئے ہیں۔ ملک کی راجدھانی میں دن دہاڑے، چوراہوں اور مرکزی سڑکوں پر قتل ہو رہے ہیں۔ یہ قتل چھپ کر یا گھروں میں گھس کر نہیں بلکہ کھلے عام اور نہایت بے رحمی سے کیے جا رہے ہیں۔انہوں نے بتایا کہ منگول پوری میں پیر کے روز دسویں جماعت کا ایک طالب علم اپنے اسکول سے رول نمبر لینے اور فیئر ویل کے بعد باہر نکلا، تو اس پر حملہ کر دیا گیا۔ حملے میں برف توڑنے والا نوکیلا سُوا استعمال کیا گیا، جو اس کے سر کے آر پار ہو گیا اور اس کی موقع پر ہی موت ہو گئی۔ اس کی ماں ابھی تک اس حقیقت کو قبول نہیں کر پا رہی کہ ان کا بیٹا اب اس دنیا میں نہیں رہا۔سوربھ بھاردواج نے بتایا کہ تریلوک پوری میں ایک نوجوان موبائل کی دکان پر فون چارج کروانے گیا تھا۔
