نئی دہلی، بھارتیہ جنتا پارٹی ( بی جے پی) کی تلنگانہ یونٹ کے سابق ریاستی ترجمان میر فراست علی باقری نے وزیر اعظم نریندرمودی اور مرکزی وزیر برائے ریلوے اشونی ویشنو کو ایک مکتوب ارسال کرکے صحافیوں کو ٹرین کے کرایہ میں مراعات بحال کرنے کا مطالبہ کیا ہے۔بی جے پی کے سینئر لیڈر میر فراست علی باقری نے آج یہاں میڈیا کو جاری اپنے بیان میں بتایا کہ ٹرین اور دیگرنقل وحمل کے ذرائع کے لیے ملک کے کسی بھی علاقے میں قیام سمیت تمام ضروری سہولیات میں رعایت ملنے سے صحافی برادران کو اپنا کام کرنے میں آسانی ہوتی ہے اس لئے صحافیوں کے مطالبے کی حمایت میں آج وزیراعظم اور ریلوے وزیرکو خط لکھ کرمذکورہ سہولیات فراہم کرنے کا پر زورمطالبہ کیا ہے۔انہوں نے بتایا کہ عالمی وبا (کووڈ 19) سے پہلے جنوبی ہند کی مختلف جرنلسٹ ایسوسی ایشنز بالخصوص تلنگانہ، آندھرا پردیش اور ہندوستانی علاقہ کے شمالی حصے سے اتر پردیش جیسی دیگر ریاستوں نے تسلیم شدہ صحافیوں کو ریلوے ٹکٹ کے کرایوں کی بحالی کے سلسلے میں حکومت ہند سے باضابطہ درخواست کی ہے۔ بتادیں کہ کووڈ-19 وبائی امراض کے عروج اور اس کے بعد لاک ڈاؤن کے دوران تسلیم شدہ میڈیا اہلکاروں کو ان کے پیشہ ورانہ فرائض کی انجام دہی کے لیے ٹرین کے کرائے میں ملنے والی رعایت واپس لے لی گئی تھی۔مسٹر باقری نے وزیر اعظم، وزیر ریلوے سمیت تمام متعلقہ افراد سے بھی درخواست کی کہ براہ کرم مندرجہ بالا باتوں پر غور کریں کیونکہ اس سے پرنٹ اور الیکٹرانک میڈیا کے پیشہ ور افراد کو اپنے فرائض کی انجام دہی میں آسانی ہوگی اورانہیں مالی مشکلات سے محفوظ رکھا جاسکے گا۔
