اننت پور (یو این آئی) گیند بازوں کی شاندار کارکردگی کی بدولت انڈیا سی نے جمعرات کو شروع ہوئے دلیپ ٹرافی کے دوسرے میچ کے پہلے دن انڈیا ڈی کو 164 رن کے معمولی اسکور پر سمیٹ دیا۔ انڈیا ڈی کی جانب سے اکشر پٹیل نے (86) رن کی نصف سنچری اننگز کھیلی اور ٹیم کو باعزت اسکور تک پہنچایا۔ اس سے قبل انڈیا سی نے ٹاس جیت کر پہلے فیلڈنگ کا فیصلہ کیا اور اس کے گیند بازوں نے انڈیا ڈی کے بلے بازوں کو ٹکنے نہیں دے کر اس فیصلے کو درست ثابت کر دیا۔ انشول کمبوج نے چار رن کے اسکور پر سلامی بلے باز اتھروا تائیڈے کو پویلین واپس بھیج دیا۔ تائیڈے نے چار رن بنائے تھے۔اس کے بعد انڈیا سی نے 23 رن کے اسکور پر مزید تین وکٹیں گنوا دیں۔ صرف اکشر پٹیل ہی مقابلہ کرسکے اور انہوں نے 86 رن کی فائٹنگ اننگز کھیل کر ٹیم کو باعزت اسکور تک پہنچایا۔ پانچ بلے باز ڈبل فیگر میں بھی نہ پہنچ سکے۔
انڈیا سی کے لیے وجے کمار ویشاکھ نے مہلک گیندبازی کرتے ہوئے 12 اووروں میں صرف 19 رن دے کر تین وکٹیں حاصل کیں، جب کہ انشول کمبوج اور ہمانشو چوہان نے دو دو اور مانو سوتھر اور ہریتھک شوکین نے ایک ایک وکٹ حاصل کی۔
انڈیا سی نے انڈیا ڈی کے 164 رن کے جواب میں اپنی پہلی اننگز میں چار وکٹ پر 91 رن بنالئے ہیں۔ دن کے کھیل کے اختتام پر بابا اندرجیت 15 رن بنا کر ناٹ آؤٹ رہے اور ابھیشیک پورل 32 رن بنا کر ناٹ آؤٹ رہے۔ انڈیا ڈی کی طرف سے ہرشیت رانا اور اکشر پٹیل نے دو دو وکٹیں حاصل کیں۔
