تہران، (یو این آئی) ایرانی صدر ابراہیم رئیسی کی ہیلی کاپٹر حادثے میں ناگہانی موت کے سبب ایران میں قبل از وقت صدارتی انتخابات کی تیاریاں شروع ہو گئیں۔
دی گارڈین کی رپورٹ کے مطابق ایرانی صدر ابراہیم رئیسی کے لیے سرکاری سوگ ختم ہوتے ہی ان کی جانشینی کے لیے مقابلہ شروع ہو گیا ہے، اور اس سلسلے میں 20 معتبر نام تجویز کیے گئے ہیں۔وزیر داخلہ احمد واحدی نے صوبائی گورنرز اور شہری انتظامیہ کو انتخابات کے لیے کمیٹیاں بنانے کے احکامات جاری کر دیے۔ایران میں صدراتی انتخابات 21 جولائی کو ہوں گے، قائم مقام صدر محمد مخبر کا کہنا ہے کہ مزاحمتی قوتوں سے متعلق ایرانی حکمت عملی تبدیل نہیں ہوگی، نئی حکومت بھی فلسطینی مزاحمتی تنظیموں کی حمایت جاری رکھے گی۔
گارڈین کے مطابق دو مرتبہ صدارت کے امیدوار رہنے والے سعید جلیلی نے اتوار کو اعلان کیا ہے کہ وہ اس بار بھی صدارت کے لیے امیدوار ہوں گے، وہ ایک سخت گیر رہنما ہیں، اور اپنے کیریئر کا بیشتر حصہ وزارت خارجہ میں گزارا ہے، چار سال قبل وہ رئیسی کے حق میں دستبردار ہوئے تھے، وہ 2007 اور 2013 کے درمیان ایران کے اہم جوہری مذاکرات کار بھی رہے۔
صدارت کے لیے ناموں کی رجسٹریشن 4 دن تک جاری رہے گی، جو کہ اس جمعرات سے شروع ہو رہی ہے۔ پہلے راؤنڈ میں 10 امیدواروں کو شامل ہونے کی اجازت دی جا سکتی ہے، جو کہ 2021 میں صرف چار تھے۔
