قوم کو مضبوط بنانے کیلئے تعلیم ہی بنیادی ستون ہے :ڈاکٹر ازہری

کالی کٹ ؍پنجاب، پریس ریلیز،ہماراسماج:ریاست پنجاب کےسرہند میں مرکز کےزیر اہتمام مرکزی کیمپس کا آج یہاں ڈاکٹر عبدالحکیم ازہری کی قیادت میں شاندار افتتاح عمل میں آیا ۔ جس میں ملک بھر سے ممتاز علماء، ماہرینِ تعلیم، سماجی رہنماؤں اور عوامی نمائندوں نے بڑی تعداد میں شرکت کی۔اس موقع پر منعقدہ اجلاس سے افتتاحی خطاب کرتے ہوئے مرکز کے ریکٹر ڈاکٹر محمد عبدالحکیم ازہری نے کہا کہ "تعلیم وہ ستون ہے جو قوم کو مضبوط بناتی ہے۔ انہوں نے ایک ترقی یافتہ اور بااختیار معاشرے کی تشکیل میں تعلیم کےکلیدی کردار پر روشنی ڈالی۔انہوں نے کہاکہ مسلمان تعلیمی پسماندگی کے خاتمہ کیلئے آگے آئیں ۔واضح رہے کہ یہ جدید کیمپس پسماندہ طبقات کی فلاح و بہبود، رہائشی تعلیم، لائبریری اور نوجوانوں و خواتین کی تربیت کے ایک اہم مرکز کے طور پر کام کرے گا۔تقریبات کا آغاز درگاہِ امام ربانیؒ پر حاضری سے ہوا۔ دو روزہ پروگراموں میں پنجاب علماء سمٹ، نیشنل این جی او کانفرنس، اسٹوڈنٹس اسمبلی، ایجو کنکلیو اور بین المذاہب رواداری کانفرنس منعقد کی گئیں۔اس موقع پر پیر سید نورانی شاہ نے پرچم کشائی کی، جبکہ مرکز کے ڈائریکٹر جنرل سی محمد فیضی نے علماء سمٹ کا افتتاح کیا۔ اس موقع پر خلیفہ سید صادق رضا، سید فواد سرہندی، مولانا فاروق لدھیانہ، صوفی اسلم چشتی اور مولانا شمس رضا مرکزی سمیت کئی اکابرین شریک ہوئے۔ایجوکیشن سمٹ کا افتتاح جامعہ ملیہ اسلامیہ کے پروفیسر سیف چوہدری نے کیا۔ بین المذاہب مکالمے کے سیشن میں گوردوارہ فتح گڑھ صاحب کے ہیڈ گرنتھی ہرپال سنگھ نے امن اور فرقہ وارانہ ہم آہنگی کا پیغام دیا۔ معزز مہمانوں میں سابق دہلی وزیر عمران حسین، ایم ایل اے روپندر سنگھ ہابی اور لکھبیر سنگھ رائے جی بھی شامل تھے۔اختتامی عوامی اجتماع سے مفتی اعظم ہند شیخ ابوبکر احمد نے خصوصی خطاب کیا۔ پیر سید نعمت اللہ شاہ جیلانی اور مفتی عبدالرحیم اکبری نے بھی تقریب میں شرکت کی۔ حضرت مجدد الف ثانی امام ربانی احمد فاروقیؒ کے نام سے منسوب یہ کیمپس پنجاب بھر میں تعلیمی اداروں اور فلاحی منصوبوں کے ہیڈکوارٹر کے طور پر کام کرے گا۔ یہ سنگِ میل مرکز کی گولڈن جوبلی تقریبات کا حصہ ہے، جو شیخ ابوبکر احمد کی قیادت میں گزشتہ 50 سالوں سے سماجی و تعلیمی خدمات انجام دے رہا ہے۔