کویت: 16دسمبر ۔سماج نیوز سروس ۔ کویت کے امیر شیخ نواف الاحمد الجابر الصباح 86 سال کی عمر میں انتقال کر گئے ہیں۔ انہیں ایک ہفتہ قبل سانس لینے میں دشواری کے باعث اسپتال میں داخل کرایا گیا تھا۔ ان کی موت کی خبر دینے سے پہلے کویت کے سرکاری ٹی وی چینل پر قرآن کی آیات پڑھی گئیں۔ اس کے بعد یہ افسوسناک خبر سنائی گئی۔ کویت کے سرکاری ٹی وی چینل نے کہا کہ افسوس کے ساتھ یہ اطلاع دینا پڑ رہی ہے کہ ہمارے شیخ نواف الاحمد الصباح انتقال کر گئے ہیں۔ ان کی طبیعت کئی دنوں سے خراب تھی۔ مارچ 2021 میں وہ علاج کے لیے امریکہ گئے تھے۔ کویت میں اقتدار کے لیے جاری کشمکش کے درمیان ان کی صحت مسلسل بگڑتی رہی۔ کویت کی حکومت علی الصباح خاندان کے پاس ہے۔ شیخ نواف کو 2006 میں ولی عہد قرار دیا گیا تھا۔ انہیں ان کے سوتیلے بھائی شیخ صباح الاحمد الصباح نے ولی عہد کا تاج پہنایا تھا۔ 2020 شیخ صباح الاحمد صباح کی وفات کے بعد شیخ نواف امیر بن گئے تھے۔ شیخ صباح حکمت عملی اور امن سازی کے لیے مشہور تھے۔ شیخ نواف کویت کے وزیر داخلہ رہ چکے تھے۔ حالانکہ وہ حکومت میں زیادہ سرگرم نہیں تھے۔ دنیا کے معمر ترین ولی عہد شیخ مشعل الاحمد الجابر، جن کی عمر 83 سال ہے، اگلے امیر ہوں گے۔ واضح ہوکہ کویت کے پاس دنیا میں تیل کے چھٹے بڑے ذخائر ہیں۔
