ویلنیو ڈی آسک (فرانس)، ( یو این آئی) یوروپا لیگ کے راؤنڈ آف 16 کے پہلے مرحلے میں انگلش کلب ایسٹن ولا نے فرانسیسی کلب للی کو اس کے ہوم گراؤنڈ پر 1-0 سے شکست دے کر برتری حاصل کر لی۔ دوسری جانب اٹلی کے دو بڑے کلبوں، بولوگنا اور اے ایس روما کے درمیان کھیلا گیا میچ 1-1 کی برابری پر ختم ہوا۔میچ کا پہلا ہاف کافی محتاط رہا، جہاں دونوں ٹیموں نے دفاعی حکمت عملی اپنائی۔ ارجنٹائن کے عالمی شہرت یافتہ گول کیپر ایمیلیانو مارٹنیز نے کچھ بہترین بچاؤ کیے، خاص طور پر رومین پیراؤڈ کی دور سے لگائی گئی ہٹ کو روک کر ولا کو خسارے سے بچایا۔میچ کا واحد گول دوسرے ہاف کے چھٹے منٹ میں دیکھنے کو ملا جب اولی واٹکنز نے ایمیلیانو بوئنڈیا کے ہیڈر پاس پر ایک بہترین لوپنگ ہیڈر کے ذریعے گیند کو جال کی راہ دکھائی۔ یہ واٹکنز کا اس سیزن کا پہلا یورپی گول تھا۔اٹلی میں کھیلے گئے میچ میں بولوگنا نے دوسرے ہاف کے آغاز میں ہی فیڈریکو برنارڈیسکی کے خوبصورت گول کے ذریعے برتری حاصل کر لی۔ تاہم، اے ایس روما نے ہمت نہیں ہاری اور 71 ویں منٹ میں متبادل کھلاڑی لورینزو پیلیگرینی نے ڈونییل مالین کے پاس پر گول کر کے اسکور برابر کر دیا۔ دونوں ٹیموں نے میچ جیتنے کی بھرپور کوشش کی اور گیند کئی بار گول پوسٹ سے ٹکرائی، لیکن مقابلہ برابری پر ختم ہوا۔
