بنگلورو، (یو این آئی )ہندوستانی خواتین کی ہاکی ٹیم کی ابھرتی ہوئی مڈفیلڈر ساکشی رانا نے اپنے عزم کا اظہار کرتے ہوئے کہا ہے کہ وہ ہر دن کو ایک نئے چیلنج کے طور پر لیتی ہیں اور ان کا واحد مقصد ٹیم کے لیے بہترین کارکردگی پیش کرنا ہے۔ 18 سالہ ساکشی اس وقت بنگلورو کے قومی کیمپ میں ہیڈ کوچ شوئرڈ مارین اور سائنٹیفک ایڈوائزر وین لومبارڈ کی نگرانی میں تربیت حاصل کر رہی ہیں۔قومی کیمپ میں جاری سخت تربیتی سیشنز کے حوالے سے ساکشی نے بتایا کہ ٹیم اپنی خامیوں کو دور کرنے کے لیے دن رات کام کر رہی ہے۔ انہوں نے کہا”وین سر ہماری طاقت اور فٹنس پر بہت کام کر رہے ہیں اور ہمیں ریکوری کی اہمیت پر خاص توجہ دے رہے ہیں۔ جہاں تک کھیل کے ڈھانچے ( کا تعلق ہے، کوچز ہمیں ہر چیز بہت تفصیل اور صفائی سے سمجھا رہے ہیں۔ سینیئر کھلاڑی بھی ہم جونیئرز کی مسلسل حوصلہ افزائی کر رہے ہیں۔ساکشی رانا، جو ٹیم میں سینٹر پوزیشن پر کھیلتی ہیں، نے بتایا کہ کوچ نے انہیں اپنی ‘پری اسکیننگ اور میدان میں ساتھی کھلاڑیوں کے ساتھ رابطے کو مزید بہتر بنانے کی ہدایت دی ہے۔ ٹیم میٹنگز میں اس بات پر زور دیا جا رہا ہے کہ بین الاقوامی سطح پر دباؤ سے بچنے کے لیے گیند کو زیادہ دیر پاس رکھنے کے بجائے بروقت پاس کرنے کی مہارت پیدا کی جائے۔ساکشی رانا کا کہنا ہے کہ ان کی تمام تر توجہ آنے والے کوالیفائنگ راؤنڈ پر مرکوز ہے۔ اگر میں کوالیفائنگ راؤنڈ کے لیے جاتی ہوں، تو میرا مقصد صرف جیت کر واپس آنا ہے۔ ابھی ہمیں کوچ کے بنائے ہوئے پلان پر سختی سے عمل کرنا ہے۔ ہندوستان کے ایف آئی ایچ ہاکی ورلڈ کپ 2026 کے کوالیفائرز 8 مارچ سے حیدرآباد، تلنگانہ میں شروع ہوں گے۔8 مارچ: بمقابلہ یوراگوئے9 مارچ: بمقابلہ اسکاٹ لینڈ11 مارچ: بمقابلہ ویلز (آخری میچ)۔
