ماہ مبارک میں روزہ،تراویح کا اہتمام فرمائیں، رمضان کی قدر اور اس کا احترام کریں،بلاتفریق مذہب غریبوں، یتیموں،بیواؤں اورانسانیت کی خدمت کریں

کانپور،سماج نیوز سروس: دور جدید میں پیش آنے والے نئے اور پیچیدہ مسائل کے حل کیلئے سابق قاضی شہر مولانا محمد متین الحق اسامہ قاسمی ؒ کی قائم کردہ شہر کانپور کے جید علماء و مفتیان پر مشتمل کل ہند اسلامک علمی اکیڈمی کے صدر مفتی اقبال احمد قاسمی،جنرل سکریٹری مولانا خلیل احمد مظاہری، مولانا امین الحق عبداللہ قاسمی و دیگر اراکین نے لوگوں کے نماز، روزہ، تراویح،زکوٰۃ، فطرہ، حج وعمرہ میں دینی معلومات اور اسلامی رہنمائی کے لئے رمضان ہیلپ لائن بنام ”الشریعہ ہیلپ لائن“جاری کرتے ہوئے تمام مسلمانوں خصوصاً اہالیان کانپور سے دردمندانہ اپیل کرتے ہوئے فرمایا کہ رمضان المبارک کی آمد آمد ہے۔ اللہ رب العزت ہر سال یہ مبارک مہینہ (ماہ رمضان) امت مسلمہ کو عطا فرماتا ہے جس میں اللہ پاک کی خاص رحمتیں و برکتیں نازل ہوتی ہیں۔۔ اللہ پاک ہماری کوتاہیوں کی اصلاح فرمائے اور رمضان مبارک کی برکات سے نوازے۔ گھر کے کسی ایک فرد کو اعتکاف میں بٹھائیں اور عورتیں گھروں میں اعتکاف کا اہتمام کریں۔ زکوٰۃ وفطرہ: ماہ رمضان، اللہ کی راہ میں خاص طور سے زیادہ سے زیادہ خرچ کرنے کا بھی مہینہ ہے جیسا کہ نبی کریم علیہ السلام کی سخاوت کا اندازاس ماہ میں بہت بڑھ جاتا تھا اس لئے جو حضرات صاحبِ نصاب ہیں ان پر تو اپنے سال کے پورے ہونے کا حساب لگاکر اپنے مال کا ڈھائی فیصد مستحقین زکوۃ پر خرچ کرنا فرض ہے اور رمضان کا ماہ گزرنے پر اپنے اور اپنے نابالغ بچوں کی طرف سے فطرہ ادا کرنے کا اہتمام بھی واجب ہے۔ باقی نفلی صدقات وغیرہ کا بھی بطور خاص اہتمام کرنا چاہئے خصوصا مدارس کے سفراء اور چندہ وصول کرنے والوں کی راحت کا بھی بھر پور خیال رکھنا چاہئے ان کو بار بار بلوانے اور چکر لگانے سے پرہیز کریں۔ہمدردی ومواسات:۔ غریبوں اور کمزور طبقات کا بھر پور تعاون کیا جائے خصوصاً یتیموں، بیواؤں اور محلے کے پریشان حال لوگوں کو افطار وسحری میں یاد رکھیں ان کو عید کی خوشیوں میں شامل کریں، ضروری سامان کے پیکٹ بنابناکر گھروں میں پہنچائیں۔ امدادی رقم سے غیر مسلم غرباء کی مدد کریں۔اس مہینہ کو رحمت دوعالم صلی اللہ علیہ وسلم نے غم خواری اور ہمدردی کا مہینہ قرار دیا ہے اس کا تقاضہ ہے کہ ہم فراخ دل کے ساتھ غریبوں کی خدمت کریں۔ مفتی عبدالرشید قاسمی نے بتایاکہ اعمال کی قیمت اور قبولیت اسی وقت ہوتی ہے؛ جب کہ ان کو سنت وشریعت کے مطابق ادا کیا گیا ہو اور یہ مسائل سے واقفیت کے بعد ہی ہوسکتا ہے اور رمضان میں نسبتاً اعمال صالحہ اور عبادات میں اضافہ ہوتا ہے اور قدم قدم پر مسائل کی ضرورت پیش آتی ہے، چنانچہ آپ کا رمضان کا بابرکت مہینہ صحیح گزرے اور آپ کے اعمال شریعت اسلامی کے مطابق انجام پائیں اور آپ کو بروقت پیش آمدہ مسئلہ کا اسلامی طریقہ معلوم ہوجائے، اس کے لیے کل ہند اسلامک علمی اکیڈمی نے حسب سابق امسال بھی الشریعہ ہیلپ لائن شروع کی ہے۔ جس کے نمبرات حسب ذیل ہیں، آپ سفر پر ہوں یا گھر پر، مرد ہوں یا خواتین، اس ہیلپ لائن سے فائدہ اٹھائیں اور عبادات واعمال عمدہ اور جاندار بنائیں اور ہم اراکین کو بھی دعوات صالحہ میں یاد رکھیں۔ مولانا خلیل احمد مظاہری نے اکیڈمی کی تاریخ پر مختصر روشنی ڈالتے ہوئے بتایا کہ سابق قاضی شہر کانپورحضرت مولانا محمد متین الحق اسامہ قاسمی ؒ نے شہر کے علماء اور مفتیان کرام پر مشتمل ایک پینل بنام کل ہند اسلامک علمی اکیڈمی 1437ہجری مطابق 2015ء میں قائم کیا تھا۔ جس کی ماہانہ میٹنگوں میں دور جدید میں پیش آنے والے تقریباً 140سے زائد اہم مسائل اب تک حل کئے جا چکے ہیں۔ مولانا امین الحق عبداللہ قاسمی نے انتظامیہ سے درخواست کی کہ وہ رمضان المبارک میں بجلی، پانی، اور مسلم محلوں میں صفائی ستھرائی کا خاص خیال رکھیں۔ بطور خاص سحری، افطاری اور تراویح کے وقت بجلی کی فراہمی کو یقینی بنایا جائے۔پریس کانفرنس میں مفتی اقبال احمد قاسمی، مولانا خلیل احمد مظاہری، مولانا امین الحق عبد اللہ قاسمی کے علاوہ مولانا محمد انیس خاں قاسمی، مولانا محمد انعام اللہ قاسمی،مولانا مفتی سید محمد عثمان قاسمی، مولانا مفتی سعود مرشد قاسمی،مولانا مفتی حفظ الرحمان قاسمی،مفتی سعد نور قاسمی، مفتی محمد دانش قاسمی،و دیگر عہدیداران موجود تھے۔