نئی دہلی،(یو این آئی) آل انڈیا فٹبال فیڈریشن کے سابق سیکرٹری جنرل کشل داس جمعہ کے روز 66 برس کی عمر میں انتقال کر گئے۔ انہوں نے 2010 سے 2022 تک، یعنی ایک دہائی سے زائد عرصے تک ہندوستانی فٹبال کی انتظامی باگ ڈور سنبھالی۔ ان کے پسماندگان میں اہلیہ اور دو بیٹے شامل ہیں۔پیشہ ورانہ طور پر چارٹرڈ اکاؤنٹنٹ کشل داس کھیل کی انتظامیہ اور نظم و نسق کا وسیع تجربہ رکھتے تھے۔ انہوں نے اپنے کیریئر کا آغاز ‘پراائس واٹر ہاؤس کوپرز اور ‘شیل جیسی عالمی کمپنیوں سے کیا۔فٹبال فیڈریشن سے قبل وہ دبئی میں انٹرنیشنل کرکٹ کونسل کے چیف فنانشل آفیسر کے طور پر بھی خدمات انجام دے چکے تھے، جس نے بین الاقوامی کھیل کی دنیا میں ان کی پہچان مستحکم کی۔وہ 1996 میں آئی ایم جی انڈیا کے سی ایف او کے طور پر بھی وابستہ رہے۔نومبر 2010 میں اے آئی ایف ایف کے سیکرٹری جنرل کا عہدہ سنبھالنے کے بعد، کشل داس کے دور میں ہندوستانی فٹبال میں کئی بڑی تبدیلیاں اور کامیابیاں دیکھنے کو ملیں۔ہندوستان نے ان کی قیادت میں پہلی بار فیفا کے کسی عالمی ٹورنامنٹ فیفا انڈر-17 ورلڈ کپ (2017) کی کامیاب میزبانی کی۔ 2017 میں ‘انڈین ویمنز لیگ کا آغاز انہی کے دور میں ہوا، جبکہ 2022 کے اے ایف سی ویمن ایشین کپ کی میزبانی بھی ان کی انتظامی صلاحیتوں کا ثبوت تھی۔
