الہ آباد :19دسمبر /سماج نیوز سروس ۔وارانسی کی گیانواپی مسجد کے معاملے میں الہ آباد ہائی کورٹ نے انجمن انتظامیہ مسجد کمیٹی اور تنازعہ سے متعلق دیگر پانچ درخواستوں پر فیصلہ سناتے ہوئے مسلم فریق کی تمام درخواستوں کو مسترد کر دیا۔ اس معاملے میں ہائی کورٹ نے 1991 کے مقدمے کی سماعت کی منظوری دی۔ اس کے ساتھ ہی وارانسی کورٹ کو 6 ماہ میں سماعت مکمل کرنے کا حکم دیا گیا ۔ اس فیصلے سے مسلم فریق کو بڑا دھچکا لگا ہے۔ واضح ہو کہ جن پانچ درخواستوں پر الہ آباد ہائی کورٹ نے اپنا فیصلہ سنایا ہے، ان میں سے تین درخواستیں وارانسی کی عدالت میں 1991 میں دائر مقدمے کی برقراری سے متعلق ہیں، جب کہ باقی دو درخواستیں سروے کے خلاف دی گئی چیلنج کی درخواستیں ہیں۔ اے ایس آئی کا حکم جسٹس روہت رنجن اگروال کی سنگل بنچ نے عرضی گزار انجمن انتظامیہ مسجد کمیٹی اور اتر پردیش سنی سنٹرل وقف بورڈاور مدعا علیہ مندر فریق کے دلائل سننے کے بعد اپنا فیصلہ سنایا۔ الہ آباد ہائی کورٹ نے اپنے فیصلے میں دیوانی مقدمے کو قابل سماعت قرار دیا ہے اور کہا ہے کہ دیوانی مقدمے کو عبادت گاہوں کے قانون 1991 سے روکا نہیں گیا ہے۔ آرڈر 7 رول 11 سول پروسیجر کوڈ کے تحت، دیوانی مقدمہ کو منسوخ نہیں کیا جا سکتا۔ جسٹس روہت رنجن اگروال نے یہ حکم انجمن انتظامیہ مسجد کمیٹی اور سنی سنٹرل وقف بورڈ کی طرف سے دائر پانچ عرضیوں کو مسترد کرتے ہوئے دیا ہے۔
ہائی کورٹ نے کہا کہ یہ سول سوٹ قومی اہمیت کا حامل ہے۔ یہ مقدمہ دو انفرادی جماعتوں کے درمیان تنازعہ نہیں ہے، یہ سول سوٹ دو بڑی برادریوں کو متاثر کرتا ہے۔ عدالت نے کہا کہ وارانسی ضلع عدالت میں دیوانی مقدمہ 32 سال سے زیر التوا ہے۔ عبوری حکم نامے کی وجہ سے سماعت گزشتہ 25 سال سے تعطل کا شکار رہی۔ عدالت نے کہا کہ قومی مفاد میں سول سوٹ کا جلد فیصلہ کیا جائے۔ فریقین سماعت میں تاخیر کے حربے اپنائے بغیر سماعت میں تعاون کریں۔ عدالت نے ماتحت عدالت کو 6 ماہ میں کیس کا فیصلہ کرنے کی ہدایت کرتے ہوئے کہا ہے کہ سماعت غیر ضروری طور پر ملتوی نہ کی جائے۔ عدالت نے اے ایس آئی کو سائنسی سروے رپورٹ عدالت میں پیش کرنے کی ہدایت کرتے ہوئے کہا کہ اگر ضروری ہو تو سروے جاری رکھا جائے۔
عدالت نے انجمن انتظامیہ مسجد کمیٹی اور سنی سنٹرل وقف بورڈ کی تمام درخواستوں کو مسترد کر دیا ہے۔ مندر فریقین کے مطابق ہائی کورٹ کا یہ فیصلہ گیانواپی میں واقع بھگوان وشویشور مندر کی تزئین و آرائش کی راہ ہموار کرنے میں سنگ میل ثابت ہوگا۔ اے ایس آئی سروے رپورٹ کی بنیاد پر گیانواپی کمپلیکس کی ملکیت کا تنازع حل کیا جائے گا۔ عدالت نے تمام عبوری احکامات بھی ختم کر دیے ہیں۔
گیانواپی کمپلیکس کے مذہبی کردار کا تعین کرنا ضروری ہے۔عدالت نے کہا کہ عبادت گاہوں کے قانون 1991 میں مذہبی کردار کی تعریف نہیں کی گئی ہے۔ صرف عبادت گاہ اور تبدیلی کی تعریف کی گئی ہے۔ کسی جگہ کا مذہبی کردار کیا ہے اس کا فیصلہ ایک مجاز عدالت فریقین کے دعووں اور جوابی دعووں اور پیش کردہ شواہد کی بنیاد پر کر سکتی ہے۔ متنازعہ مسئلہ ایک حقیقت اور قانون کا ہے۔ عدالت نے کہا کہ آیا گیانواپی کمپلیکس میں ہندو مذہبی کردار ہے یا مسلم مذہبی کردار، عدالت شواہد کی بنیاد پر ابتدائی قانونی مسائل کو طے کر کے فیصلہ کر سکتی ہے۔ عدالت نے کہا کہ 1991 کا قانون عبادت گاہ میں تبدیلیوں کو منع کرتا ہے جیسا کہ 15 اگست 1947 کو ہوا تھا۔ لیکن قانون عبادت کی جگہ کے مذہبی کردار کا تعین کرنے کے عمل کے لیےگائڈ لائن فراہم نہیں کرتا ہے۔ ہائی کورٹ نے کہا کہ 1991 میں دائر سول مقدمہ 32 سال سے زیر التوا ہے۔ جسے قومی مفاد میں ختم کرنے کی ضرورت ہے۔
اس سے پہلے 8 دسمبر کو الہ آباد ہائی کورٹ کے جسٹس روہت رنجن اگروال نے عرضی گزار انجمن انتظامیہ مسجد کمیٹی اور اتر پردیش سنی سنٹرل وقف بورڈ اور مدعا علیہ مندر کی طرف سے دلائل سننے کے بعد چوتھی بار اپنا فیصلہ محفوظ کر لیا تھا۔
قابل ذکر ہے کہ مسلمانوں کی طرف سے گیانواپی مسجد کی انتظامی کمیٹی کی 3 اور یوپی سنی سنٹرل وقف بورڈ کی 2 درخواستیں داخل کی گئی ہیں۔ مسلم فریق کی دلیل میں کہا گیا ہے کہ 1991 کے پلیس آف ورشپ ایکٹ کے تحت آدی وشویشور کے کیس کی سماعت نہیں کی جا سکتی۔ اس قانون میں کہا گیا ہے کہ کسی بھی مذہب کی عبادت گاہ جو 15 اگست 1947 کو موجود تھی، وہ بعد میں بھی موجود رہے گی۔وہیں، ہندو فریق کی طرف سے یہ دلیل دی گئی کہ یہ تنازعہ آزادی سے پہلے کا ہے اور گیانواپی تنازعہ میں عبادت گاہوں کا قانون لاگو نہیں ہوگا۔ ہندو فریق نے اس جگہ پر مندر کو بحال کرنے کا مطالبہ کیا ہے جہاں اس وقت گیانواپی مسجد واقع ہے۔ ہندوؤں کے مطابق، گیانواپی مسجد مندر کا ایک حصہ ہے۔
