نئی دہلی، (یو این آئی) حکومت کے ایک اعلیٰ عہدیدار نے بدھ کے روز کہا ہے کہ مغربی ایشیا کے جاری بحران کی وجہ سے عالمی توانائی کی ترسیل کے راستوں میں پیدا ہونے والے خلل کے باوجود ہندوستان کی خام تیل کی سپلائی محفوظ ہے، جس کی وجہ ملک کی متنوع ذرائع سے خریداری کی حکمت عملی اور ایندھن کی دستیابی کو مستحکم کرنے کے لیے کیے گئے ہنگامی اقدامات ہیں۔ وزارت پیٹرولیم اور قدرتی گیس کی جوائنٹ سیکرٹری سجاتا شرما نے بتایا کہ ہندوستان کی خام تیل کی موجودہ خریداری کی مقدار اس مقدار سے زیادہ ہے جو عام طور پر تزویراتی طور پر اہم آبنائے ہرمز کے ذریعے پہنچتی ہے۔ ایک بین وزارتی پریس بریفنگ میں سجاتا شرما نے کہا، "ہندوستان کی خام تیل کی سپلائی محفوظ ہے۔ ہماری روزانہ کی کھپت تقریباً 55 لاکھ بیرل ہے۔ متنوع خریداری کے ذریعے ہم نے آج جو مقدار حاصل کی ہے وہ اس مقدار سے زیادہ ہے جو عام طور پر اس مدت کے دوران آبنائے ہرمز کے ذریعے پہنچتی تھی۔” انہوں نے مزید کہا کہ ہندوستان تقریباً 40 ممالک سے خام تیل درآمد کرتا ہے، جس کی وجہ سے وہ کلیدی جہاز رانی کے راستوں کو متاثر کرنے والی جغرافیائی سیاسی کشیدگی سے پیدا ہونے والے خطرات کو کم کرنے کے قابل ہے۔ ملک بھر میں پیٹرولیم مصنوعات کی بلا تعطل دستیابی کو یقینی بنانے کے لیے ملکی ریفائنریاں اپنی پوری صلاحیت اور بعض صورتوں میں تو صلاحیت سے بھی زیادہ پر کام کر رہی ہیں۔ حکومت نےرقیق پیٹرولیم گیس (ایل پی جی) اور رقیق قدرتی گیس (ایل این جی)کی سپلائی میں ممکنہ کمی سے نمٹنے کے لیے بھی اقدامات کا اعلان کیا ہے۔ سجاتا شرما نے بتایا کہ نئے ذرائع سے حاصل کیے گئے ایل این جی کے دو بحری جہاز اس وقت ہندوستان کے راستے میں ہیں۔ انہوں نے کہا، "مغربی ایشیا کی کشیدگی سے منسلک سپلائی کے دباؤ کے دوران حکومت نے ایل پی جی کی قیمتوں میں اضافے کا ایک بڑا حصہ خود برداشت کیا ہے تاکہ صارفین کو زیادہ قیمتوں سے بچایا جا سکے۔ فی الحال ایل پی جی کی سپلائی میں گھریلو صارفین کو ترجیح دی جا رہی ہے، جبکہ غیر گھریلو سپلائی کو ہسپتالوں اور تعلیمی اداروں جیسے ضروری شعبوں کی طرف موڑ دیا گیا ہے۔” ہندوستان اپنی ایل پی جی کی ضرورت کا تقریباً 60 فیصد درآمد کرتا ہے، جس میں سے تقریبًا 90 فیصد درآمدات آبنائے ہرمز سے گزرتی ہیں۔ سجاتا شرما نے مزید کہا کہ "ملکی سطح پر دستیابی کو مضبوط بنانے کے لیے حکومت نے ریفائننگ اور پیٹرو کیمیکل یونٹس کو ایل پی جی کی پیداوار کو بہترین بنانے کی ہدایت دی ہے۔ اس کے نتیجے میں مقامی ایل پی جی کی پیداوار میں تقریباً 25 فیصد اضافہ ہوا ہے اور اس اضافی سپلائی کو بنیادی طور پر گھریلو صارفین کی طرف موڑ دیا گیا ہے تاکہ کھانا پکانے کی گیس کی بلا تعطل فراہمی کو یقینی بنایا جا سکے۔” گیس کی فراہمی میں کھاد کی تیاری، چائے کی پیداوار اور گیس گرڈ کے آپریشنز سمیت اہم شعبوں کو بھی ترجیح دی جا رہی ہے۔ طلب کے انتظام کے ایک عارضی اقدام کے طور پر، ایل پی جی سلنڈر کی بکنگ کے درمیان کم از کم وقفہ 21 دن سے بڑھا کر 25 دن کر دیا گیا ہے۔ شرما نے صارفین سے اپیل کی کہ وہ گھبرائیں نہیں اور نہ ہی سلنڈر بک کرنے میں جلد بازی کریں، انہوں نے یقین دلایا کہ سپلائی کافی حد تک دستیاب ہے۔ دریں اثنا مغربی ایشیا کے بحران کے باعث ایندھن کی سپلائی چین پر پڑنے والے اثرات کے درمیان حکومت نے گھریلو صارفین کو مشورہ دیا ہے کہ وہ رسوئی گیس سلنڈر کی بکنگ میں گھبراہٹ کا مظاہرہ نہ کریں۔ حکومت نے بدھ کو کہا کہ وہ اس عالمی چیلنجنگ صورتحال پر گہری نظر رکھے ہوئے ہے اور معمول کے دنوں کی طرح بکنگ کے ڈھائی دن کے اندر سلنڈر فراہم کر دیا جائے گا۔ اس کے ساتھ ہی متاثرہ ممالک میں پھنسے ہندوستانیوں کی سلامتی اس کی اولین ترجیح ہے۔حکومت نے کہا کہ ایندھن کی ذخیرہ اندوزی اور کالا بازاری سے نمٹنے کے لیے بھی سخت اقدامات کیے جا رہے ہیں۔
