گجرات انتخابات کیلئے کانگریس نے اپنا منشور جاری کر دیا ہے۔ کانگریس کے سینئر لیڈر اور راجستھان کے وزیر اعلی اشوک گہلوت سمیت کئی لیڈر اس دوران احمد آباد میں موجود تھے۔ منشور میں پارٹی نے 10 لاکھ نوکریاں دینے کا وعدہ کیا ہے۔ ساتھ ہی کسانوں کی قرض معافی اور 300 یونٹ تک مفت بجلی دینے کا بھی وعدہ کیا گیا ہے۔گجرات کے انتخابی منشور جاری کرتے وقت ریاست کے انچارج اور راجستھان کے وزیر اعلیٰ اشوک گہلوت نے کہا کہ یہ ایک تاریخی لمحہ ہے، حکومت بنتے ہی کابینہ کے پہلے اجلاس میں اس منشور پر عمل کیا جائے گا۔ ان کا مزید کہنا تھا کہ کانگریس ہمیشہ منشور کو اہمیت دیتی ہے۔اشوک گہلوت نے کہا کہ کانگریس کی سابق صدر سونیا گاندھی کی سخت ہدایات تھیں کہ منشور کو ترجیح دی جائے۔ انہوں نے کہا کہ کانگریس لیڈر راہل گاندھی نے جو وعدے کئے ہیں انہیں ہر قیمت پر پورا کیا جائے گا۔ گہلوت نے کہا کہ انہوں نے 6 لاکھ لوگوں سے مشاورت کے بعد منشور تیار کیا ہے۔ انہوں نے کہا کہ موجودہ حکومت عوام کو گمراہ کر رہی ہے اور گجرات میں صرف کانگریس کی حکومت بنے گی۔
کانگریس نے منشور میں کہا کہ گھریلو خواتین کو 500 روپے میں گیس سلنڈر دیا جائے گا اور گیس سلنڈر پر سبسڈی کے طور پر باقی رقم حکومت ادا کرے گی۔کانگریس نے طلبہ کی تعلیم کے لیے خصوصی اسکیمیں بنانے کا وعدہ کیا ہے۔ کانگریس نے کہا کہ اعلیٰ تعلیم کی فیس میں 20 فیصد کمی کی جائے گی۔ دیگر سروس چارجز ختم کر دیئے جائیں گے۔ منشور میں کہا گیا ہے کہ کسانوں کے قرضے معاف کئے جائیں گے۔ تالاب بنانے کے لیے حکومت سبسڈی دے گی۔ نہر سے پانی کھیتوں تک مفت پہنچانے کے انتظامات کیے جائیں گے۔ vہر گجراتی کا 10 لاکھ تک کا مفت علاج کیا جائے گا اور مفت ادویات فراہم کی جائیں گی۔vکسانوں کا 3 لاکھ تک کا قرضہ معاف، بجلی کا بل معاف، عام بجلی صارفین کو 300 یونٹ تک مفت بجلی فراہم کی جائے گی۔ vگجرات میں 10 لاکھ سرکاری ملازمتوں میں نوجوانوں کی بھرتی، 50 فیصد ملازمتیں خواتین کیلئے مختص ہوں گی۔ vکنٹریکٹ آؤٹ سورسنگ سسٹم سے سرکاری نوکریاں ختم ہو جائیں گی، بے روزگار نوجوانوں کو 3000 روپے ماہانہ بے روزگاری الاؤنس حاصل ہوگا۔vدودھ پیدا کرنے والوں کو 5 روپے فی لیٹر سبسڈی دی جائے گی۔vگجرات میں 3000 سرکاری انگلش میڈیم اسکول کھولے جائیں گے، جس میں لڑکیوں کو کے جی سے پی جی (پوسٹ گریجوایٹ) تک مفت تعلیم دی جائے گی۔4v لاکھ روپے کا کووڈ معاوضہ دیا جائے گا۔ vگزشتہ 27 سالوں میں جو بدعنوانی ہوئی ہے اس کی تحقیقات کی جائیں گی، انسداد بدعنوانی کا قانون لایا جائے گا اور قصورواروں کو جیل میں ڈالا جائے گا۔ vگجرات میں پرانی پنشن اسکیم نافذ کی جائے گی۔vمنریگا اسکیم جیسی شہری روزگار گارنٹی اسکیم لائی جائے گی۔vغذائی قلت کو روکنے اور غریبوں کو غذائیت سے بھرپور خوراک فراہم کرنے کیلئے اسکیم نافذ کی جائے گی۔خیال رہے کہ گجرات میں دو مرحلوں میں انتخابات ہوں گے اور ووٹنگ یکم اور 5 دسمبر کو ہوگی، جبکہ نتائج کا اعلان 8 دسمبر کو کیا جائے گا۔
