چنڈی گڑھ، (یو این آئی) ہریانہ کے وزیر اعلیٰ نائب سنگھ سینی نے پنجاب کے ضلع گرداسپور میں واقع گردوارہ شری چولا صاحب، ڈیرہ بابا نانک پہنچ کر مٹّھا ٹیکا اور ارداس کی۔ اس دوران انہوں نے گروؤں کا آشیرباد حاصل کرتے ہوئے ریاست اور ملک کے باشندوں کی سکھ، شانتی اور خوشحالی کی تمنا کی۔ انہوں نے گرو کے لنگر میں سیوا بھی کی۔وزیر اعلیٰ نے کہا کہ گروؤں کی تعلیمات انسانیت، خدمت، بھائی چارے اور سچائی کی راہ پر چلنے کی ترغیب دیتی ہیں۔ انہوں نے کہا کہ گرو روایت کا پیغام معاشرے میں ہم آہنگی، اتحاد اور فلاح و بہبود کے جذبے کو مضبوط کرتا ہے۔ مسٹر سینی نے کہا کہ ریاستی حکومت عوامی خدمت کے عزم کے ساتھ مسلسل کام کر رہی ہے اور گروؤں کے آشیرواد سے ہریانہ مسلسل ترقی کی راہ پر گامزن ہے۔ انہوں نے ملک اور ریاست کے لوگوں کے روشن مستقبل، خوشحالی اور ترقی کی بھی تمنا کی۔اس موقع پر روی کرن کاہلوں، راجیندر کمار بٹو، نرمل سنگھ، پرمیت سنگھ بیدی اور وزیر اعلیٰ کے سیاسی سکریٹری ترون بھنڈاری اور دیگر معززین موجود تھے۔
