شعبہ معالجات کی جانب سے صحت بیداری کیمپ کا انعقاد

علی گڑھ، 21 مئی،سماج نیوز سروس:علی گڑھ مسلم یونیورسٹی (اے ایم یو) کی فیکلٹی آف یونانی میڈیسن (اے ایم یو) کے شعبہ معالجات نے اے ایچ انڈس پبلک اسکول، علی گڑھ میں صحت بیداری کیمپ کا اہتمام کیا، جس میں طلباء کو صحت مند طرز زندگی اور گرمیوں میں احتیاطی تدابیر کے سلسلہ میں قیمتی مشورے دئے گئے۔ڈاکٹر ایس جاوید علی نے موسم گرما میں صحت و جسمانی صفائی پر لیکچر دیا، اس کے بعد شعبہ کے ایم ڈی اسکالرز مسٹر محمد مشفق اور مسٹر عبداللہ فیض الحسن نے موسم گرما کی احتیاطی تدابیر پر روشنی ڈالی۔ دونوں مقررین نے اس بات پر زور دیا کہ گرمی کے مہینوں میں پسینے سے بدن میں پانی کی کمی ہوسکتی ہے، جو نقصان دہ ہوسکتا ہے۔ انہوں نے طلباء کو مشورہ دیا کہ وہ روزانہ کم از کم دو سے تین لیٹر پانی پئیں، دن کے ٹھنڈے حصہ میںہی گھر سے باہر نکلیں، ڈھیلے کپڑے پہنیں، بدہضمی سے بچنے کے لیے زود ہضم غذا کھائیں اور جلد کو الٹرا وائلٹ شعاعوں سے بچانے کے لئے سن اسکرین کا استعمال کریں۔ انہوں نے طلباء پر زور دیا کہ وہ آنکھوں کو سورج کی تیز شعاعوں سے بچانے کے لیے چشمہ پہنیں، کیفین کے زیادہ استعمال سے گریز کریں، دوپہر کے وقت گھر کے اندر رہنے کی کوشش کریں، فاسٹ فوڈ، زیادہ تلی بھنی غذا یا اسٹریٹ فوڈ سے پرہیز کریں، وافر مقدار میں پانی پیئیں، ورزش بھی کریں اور ڈبہ بند مشروبات زیادہ نہ استعمال کریں کیونکہ ان میں شکر کی زیادہ مقدار ہوتی ہے۔ طلباء کو موسمی پھل اور سبزیاں کھانے کا بھی مشورہ دیا گیا۔اسکول کی پرنسپل مسز شاہین پروین نے شعبہ معالجات کے اراکین کا خیر مقدم کرتے ہوئے ان کا شکریہ ادا کیا اور مستقبل میں بھی ایسے پروگراموں کے انعقاد کی خواہش کا اظہار کیا ۔شعبہ معالجات کے چیئرمین پروفیسر بدر الدجیٰ خاںنے اس طرح کے پروگراموں کو طلباء کے لئے بہت سود مند قرار دیا اور اسکول انتظامیہ کی تعریف کی ۔اس موقع پرشعبہ معالجات سے مسٹر احمر معراج اور مسٹر عارف خاں بھی موجود تھے۔