سری نگر، (یو این آئی) : جموں و کشمیر کرکٹ ٹیم نے ہفتہ کے روز آٹھ بار کے چمپئن کرناٹک کو فائنل میں شکست دے کر پہلی بار رانجی ٹرافی کا خطاب اپنے نام کرکے تاریخ رقم کر دی یہ فتح خطے کی کرکٹ تاریخ میں ایک سنگ میل کی حیثیت رکھتی ہے موں و کشمیر کرکٹ ٹیم نے رانجی فائنل کے پورے مقابلے کےدوران شاندار نظم و ضبط اور ہمت و حوصلے کا مظاہرہ کیا جمعہ کو 291 رنز کی زبردست برتری حاصل کرنے کے بعد، جموں و کشمیر نے پانچویں اور آخری دن ایک اور شاندار بلے بازی کا مظاہرہ کیا اور میچ پر اپنی گرفت مضبوط کر لی۔اپنی دوسری اننگز 186 رنز چار کھلاڑی آؤٹ پر دوبارہ شروع کرتے ہوئے، قمران اقبال، 94 رنز پر ناٹ آوٹ رہے تھے، اور ساحل لوترا، جو 16 رنز پر تھے، نے شاندار سنچریاں مکمل کیں جس کے ساتھ جموں و کشمیر نے اپنی مجموعی برتری کو 633 رنز تک پہنچا دیا۔ پانچویں دن لنچ تک ٹیم کا سکور چار وکٹ پر 285 تھا۔قبل ازیں، جموں و کشمیر کے پہلی اننگز کے 584 رنز کے جواب میں، کرناٹک کی ٹیم 93.3 اوورز میں 293 رنز پر ڈھیر ہوگئی، تیز گیند باز عاقب نبی نے 54 رنز کے عوض پانچ وکٹیں لے کر اپنی ٹیم کو مکمل کنٹرول میں رکھا۔یہ فتح جموں و کشمیر کا پہلا رانجی ٹرافی خطاب ہے، جو کہ 67 سال قبل ٹورنامنٹ کھیلنا شروع کرنے کے بعد سے خطے کے کرکٹ سفر میں ایک تاریخی کامیابی ہے۔جموں وکشمیر نے سیمی فائنل میں بنگال کو ہرا کر فائنل میں جگہ حاصل کی تھی۔واضح رہے کہ جموں و کشمیر کے وزیر اعلیٰ عمر عبداللہ اپنے مشیر ناصر اسلم وانی اور نیشنل کانفرنس کے ترجمان اعلیٰ تنویر صادق کے ہمراہ کھلاڑیوں کی حوصلہ افزائی کے لئے گذشتہ شام ہی کرناٹک کے شہر ہبلی پہنچے تھے۔
