لبنانی تنظیم حزب اللہ نے دھمکی دی ہے کہ اگر اسرائیل نے لبنان پر شدید بم باری کا سلسلہ جاری رکھا تو شمالی اسرائیل میں حیفا اور دیگر شہروں کو زیادہ بڑے پیمانے پر نشانہ بنایا جائے گا۔ اسرائیل کی جانب سے لبنان پر بم باری میں 23 ستمبر سے شدت آ گئی ہے۔
ادھر اسرائیلی فوج نے منگل کی شب بیروت کے جنوبی نواحی علاقے الضاحیہ پر چار فضائی حملے کیے۔ اس کے علاوہ شمالی بقاع میں بعلبک شہر کے اطراف بالخصوص نبی شیت، دورس، الفاکہہ اور بریتال کے علاقوں کو بھی شدید بم باری کا نشانہ بنایا گیا۔بعد ازاں اسرائیلی بحری جنگی جہاز نے الضاحیہ پر تین میزائل داغے۔اسرائیلی فوج کے مطابق منگل کے روز لبنان کی سمت سے شمالی اسرائیل کے علاقوں پر تقریبا 85 راکٹ داغے گئے۔ ان علاقوں میں حیفا شہر بھی شامل ہے۔حزب اللہ نے منگل کے روز اپنے ٹیلیگرام چینل پر جاری پوسٹ میں بتایا ہے کہ اس کے جنگجو جنوبی لبنان میں سرحدی علاقوں میں پیش قدمی کی کوشش کرنے والے اسرائیلی فوجی یونٹوں کے خلاف مزاحمت کر رہے ہیں۔ تنظیم کے بیان کے مطابق جھڑپوں میں کم از کم 35 اسرائیلی فوجی اہل کار اور افسران مارے گئے اور 200 کے قریب زخمی ہوئے۔لبنان کے سرکاری میڈیا نے منگل کے روز بتایا کہ بیروت کے جنوبی نواحی علاقے اور حزب اللہ کے بنیادی گڑھ الضاحیہ پر اسرائیلی فوج کے مسلسل حملوں سے "بڑی تباہی” پھیلی ہے۔
یہ علاقہ 23 ستمبر سے اسرائیل کی شدید بم باری کی لپیٹ میں ہے۔ اسرائیل کا کہنا ہے کہ وہ حزب اللہ کے بنیادی ڈھانچے اور تنصیبات کو نشانہ بنا رہا ہے۔لبنان پر اسرائیلی فضائی حملوں کے نتیجے میں اب تک 12 لاکھ افراد نقل مکانی کر چکے ہیں۔ بہت سے لوگوں کو خدشہ ہے کہ اسرائیل کی جانب سے بم باری میں شدت آنے سے لبنان کو وسیع تباہی کا سامنا ہو سکتا ہے بالکل اسی طرح جس طرح غزہ کی پٹی میں اسرائیل کے فضائی اور زمینی حملے کے نتیجے میں ہوا۔اسرائیلی فوج اپنے زمینی آپریشن کو "محدود کارروائی” قرار دے رہی ہے۔ تاہم گذشتہ ہفتے آپریشن شروع ہونے کے بعد سے اس کا دائرہ وسیع ہوتا جا رہا ہے۔ اسرائیلی فوج کا کہنا ہے کہ اس کا مقصد سرحدی علاقوں کو وہاں چھپے حزب اللہ کے جنگجوؤں سے پاک کرنا ہے اور وہ لبنان کے اندر زیادہ بڑے پیمانے پر مداخت کا منصوبہ نہیں رکھتی ہے۔
