اعجاز ڈار
سرینگر،22؍ مئی،سماج نیوز سروس:امسال وادی کشمیر میں مسلسل خراب موسمی صورتحال کے بیچ گزشتہ کچھ دنوں سے گرمی کی لہر میںکافی اضافہ ہو گیا جس کے نتیجے میں لوگوں کو کافی مشکلات کا سامنا ہے ۔بدھ وار کو ایک مرتبہ پھر لوگوں کو شدید گرمی سے کوئی راحت نہیںملی اور ان کا درجہ حرارت 31ڈگری عبور کر گیا ۔اس دوران محکمہ موسمیات کا کہنا ہے کہ وادی کشمیر میں مستقبل قریب میں بارشوں ہونے کا کوئی امکان نہیں ہے تاہم 28مئی سے موسمی صورتحال میں تبدیلی کا امکان ہے اور بارشیںہو سکتی ہے جس سے لوگوں کو گرمی کی شدید لہر سے راحت ملے گی۔تفصیلات کے مطابق جہاں ماہ مئی میں درجہ حرارت میں اضافہ کے نتیجے میں پائی جانے والی شدید گرمی کی وجہ سے اہل وادی کیلئے رات دن تکلیف دہ ثابت ہو رہے ہیں وہیں گرمی میں روز بروز اضافہ ہو رہا ہے جس کی ایک کڑی کے تحت سرینگر میں بدھوار کا سب سے گرم ترین دن ریکارڈ کیا گیا ۔بدھوار کو دن بھر شدید گرمی کی لہر جاری رہی جس دوران درجہ حرارت 31.5ڈگری سیلشس ریکارڈ کیا گیا ۔محکمہ موسمیات کے مطابق جموں میں بھی گرمی کی شدید لہر جاری ہے اور 44ڈگری سیلشس ریکار ڈ کیا گیا ۔ محکمہ کے مطابق وادی کشمیر میں آئندہ چند دونوں میں موسم میں تبدیلی آنے کے امکانات نہیں ہے اور مجموعی طور پر موسم خشک ہی رہیگا ۔تاہم انہوں نے اس بات کے امکانات ظاہر کئے ہیں کہ گرمی کی شدت میں کمی آسکتی ہے ۔کیونکہ 28مئی سے بارشیں ہوسکتی ہے ۔ ادھر دن گرم ہونے کے ساتھ ہی مجموعی طور پر خشک موسم کی پیشینگوئی کے بیچ جموں و کشمیر کے بیشتر مقامات پر رات کے درجہ حرارت میں اضافہ ہوا محکمہ موسمیات نے بتایا کہ اگلے 24 گھنٹوں میں بنیادی طور پر خشک موسم کی توقع ہے۔ انہوں نے کہا کہ 27مئی تک کسی ’’بڑی تبدیلی‘‘کی توقع نہیں تھی حالانکہ شام کی بارش کے امکان کو، اگرچہ کم ہے لیکن مکمل طور پر رد نہیں کیا جا سکتا۔درجہ حرارت کے بارے میںمحکمہ موسمیات نے بتایا کہ سرینگر میں گزشتہ رات 13.2 ڈگری کے مقابلے میں 14.2 ڈگری کا کم ریکارڈ کیا گیا ۔ اسی طرح سے قاضی گنڈ میں گزشتہ رات 10.6 ڈگری کے مقابلے میں کم از کم 11.6 ڈگری سیلشس ، کوکرناگ میں کم از کم درجہ حرارت 11.4 ڈگری سینٹی گریڈ کے مقابلے 10.8 ڈگری سینٹی گریڈ اور کپوارہ قصبہ میں گزشتہ رات 10.5 ڈگری کے مقابلے میں کم از کم 10.7ڈگری سیلشس ریکارڈ کیا گیا ۔ محکمہ موسمیات نے بتایا کہ پہلگام میں گزشتہ رات 6.2 ڈگری کے مقابلے میں 7.5 ڈگری سیلشس کا کم سے کم درجہ حرارت اور شہرہ آفاق گلمرگ میں گلمرگ میں گزشتہ رات 8.2 ڈگری کے مقابلے میں کم از کم 11.0ڈگری سیلشس ریکارڈ کیا گیا ۔ انہوں نے کہا کہ جموں میں گزشتہ رات 24.7 ڈگری کے مقابلے میں 27.1 ڈگری سیلشس کا کم درجہ حرارت ریکارڈ کیا گیا ۔انہوں نے کہا کہ بانہال میں کم سے کم درجہ حرارت 13.2 ڈگری سینٹی گریڈ، بٹوٹ میں 17.5 ڈگری سینٹی گریڈ اور بھدرواہ میں 13.8 ڈگری سینٹی گریڈ ریکارڈ کیا گیا۔
