حیدرآباد: حیدرآباد پولس نے رمضان المابرک کے آخری جمعہ یعنی جمعۃ الوداع کے پیش نظر پرانے شہر میں واقع تاریخی مکہ مسجد اور سکندر آباد میں جامع مسجد کے ارد گرد ٹریفک پر کچھ حد تک پابندی عائد کی گئی ہے۔ چار مینار اور مدینہ کے درمیان، چار مینار اور مرغی چوک اور چار مینار اور راجیش میڈیکل ہال، شالی بندہ کے درمیان اہم سڑکیں صبح 9 بجے سے سہ پہر تین بجے تک ہر طرح کی گاڑیوں کی نقل و حمل کے لیے بند رہیں گی۔چار مینار سے آنے والے ٹریفک کا رخ کئی مقامات کی جانب موڑا جائے گا۔ نیا پل کی طرف سے چار مینار کی جانب جانے والے ٹریفک کا رخ مدینہ جنکشن سے سٹی کالج کی جانب موڑا جائے گا۔ اسی طرح ہمت پورہ، چوک میدان خان، موتی گلی، اتھیبار چوک، سہرِ باطل کمان، لکڑ کوٹے کے ٹریفک کو بھی ڈائیورٹ کیا جائے گا۔ٹریفک پولس نے یہ بھی اعلان کیا ہے کہ مکہ مسجد آنے والے عقیدت مندوں کی گاڑیوں کے لیے سات مختلف مقامات پر پارکنگ کے انتظامات کیے جائیں گے۔ خیال رہے کہ حیدرآباد کے مختلف علاقوں اور تلنگانہ کے کئی اضلاع سے بھی ہزاروں لوگ جمعۃ الوداع کی نماز ادا کرنے مکہ مسجد آتے ہیں۔ مسجد اور چارمینار سے ملحقہ سڑکوں پر لوگوں کے لیے نماز ادا کرنے کا بھی انتظام کیا گیا ہے۔نماز جمعہ کے بعد آل انڈیا مجلس اتحاد المسلمین (اے آئی ایم آئی ایم) کے صدر اسد الدین اویسی مکہ مسجد میں اجتماع سے خطاب کریں گے۔ جماعت کو ہر سال جمعۃ الوداع کی نماز کے بعد جلسہ یوم القرآن منعقد کرنے کی اجازت دی جاتی ہے۔
