نئی دہلی، 9مئی ( آئی این ایس انڈیا )سن رائزرس حیدرآباد کی بدھ کو لکھنؤ سپر جائنٹس کے خلاف جیت نے پوائنٹس ٹیبل میں ہلچل مچا دی ہے۔ ٹریوس ہیڈ اور ابھیشیک شرما کی طوفانی اننگز کی بدولت ایس آر ایچ نے 62 گیندیں باقی چھوڑ کر لکھنو کو 10 وکٹوں سے شکست دی۔ ٹریوس ہیڈ اور ابھیشیک شرما کی جوڑی نے صرف 58 گیندوں میں 166 رنز کے ہدف کا تعاقب کر کے تاریخ رقم کر دی۔ اس کی وجہ سے ایل ایس جی کے نیٹ رن ریٹ میں نمایاں کمی آئی ہے اور اس کی وجہ سے آئی پی ایل 2024 پلے آف سے باہر ہونے والی پہلی ٹیم مل گئی ہے۔57 میچوں کی تکمیل کے بعد پلے آف سے باہر ہونے والی پہلی ٹیم کا سامنے آنا اس بات کا ثبوت ہے کہ یہ سیزن سنسنی سے بھرپور رہا ہے۔ممبئی انڈینس اگرچہ پوائنٹس ٹیبل میں 9ویں نمبر پر ہے لیکن وہ پلے آف سے باہر ہونے والی پہلی ٹیم بن گئی ہے۔ ایم آئی نے آئی پی ایل 2024 میں اب تک 12 میچز کھیلے ہیں جن میں سے اس نے صرف 4 میچ جیتے ہیں۔ اگر ممبئی انڈینس اپنے اگلے دو میچ جیت لیتی ہے تو اس کے 12 پوائنٹس ہو جائیں گے۔ اگرچہ CSK، LSG اور DC کے پاس فی الحال 12 پوائنٹس ہیں، لیکن دہلی کیپٹلس کا لکھنؤسپر جائنٹس کے خلاف میچ ابھی باقی ہے۔ یہ میچ منسوخ ہونے کی صورت میں بھی دونوں ٹیموں کے 13 پوائنٹس ہوں گے۔ اگر کوئی ٹیم جیت جاتی ہے تو اس کے پوائنٹس 14 ہو جائیں گے۔ چونکہ ممبئی کے لیے 13 یا 14 پوائنٹس حاصل کرنا ناممکن ہے، اس لیے وہ اب آئی پی ایل 2024 کے پلے آف کی دوڑ سے باہر ہے۔اگر ہم آئی پی ایل 2024 کے پوائنٹس ٹیبل پر نظر ڈالیں تو پہلے اور دوسرے نمبر پر موجود کے کے آر اور آر آر کے فی الحال 16 پوائنٹس ہیں۔ ایل ایس جی کیخلاف زبردست جیت کے بعد سن رائزرس حیدرآباد کے 14 پوائنٹس ہیں، اس لیے یہ ٹیم ٹیبل میں تیسرے نمبر پر آگئی ہے۔ نیز حیدرآباد کا نیٹ رن ریٹ اب مائنس سے بڑھ کر +0.406 پر آ گیا ہے۔ CSK اب چوتھے مقام پر کھسک گئی ہے جس کے فی الحال 12 پوائنٹس ہیں۔ممبئی انڈینس واحد ٹیم ہے جو اب تک آئی پی ایل 2024 کے پلے آف سے باہر ہے۔ اس کا مطلب ہے کہ فی الحال 5 ٹیموں کے پاس ٹاپ 4 میں پہنچنے کا موقع ہے۔ دہلی کیپٹلس اور لکھنؤ سپر جائنٹس کے بھی فی الحال CSK کی طرح 12 پوائنٹس ہیں۔ لیکن دہلی اور لکھنؤ کا نیٹ رن ریٹ چنئی سے کم ہے۔ دہلی اور لکھنؤ کے ابھی 2-2 میچ باقی ہیں، اس لیے ان کے پاس ٹاپ 4 میں جانے کا موقع ہے۔ ان کے علاوہ RCB، PBKS اور GT نے اب تک 11 میچ کھیلے ہیں اور تینوں ٹیموں کے پاس 4 جیت کے بعد آٹھ پوائنٹس ہیں۔ اگر بنگلورو، پنجاب اور گجرات پلے آف کی دوڑ میں رہنا چاہتے ہیں تو انہیں اپنے باقی تمام میچ جیتنے ہوں گے۔ فی الحال، سب کی نظریں خاص طور پر جمعہ کو ہونے والے CSK بمقابلہ GT میچ پر ہوں گی۔ اس میچ میں چنئی کی جیت سے گجرات یقینی طور پر باہر ہو جائے گا، جب کہ باہر ہونے کی تلوار آر سی بی اور پنجاب پر بھی لٹک جائے گی۔
