ممبئی (یو این آئی) انڈین پریمیئر لیگ (آئی پی ایل) کے ٹیم مالکان نے کہا ہے کہ جو غیر ملکی کھلاڑی نیلامی میں خریدے جانے کے بعد بغیر کسی ٹھوس وجہ کے دستیاب نہیں رہتے ہیں، ان پر دو سال کی پابندی عائد کردی جانی چاہیے۔ فرنچائزز نے یہ مطالبہ ٹیم کے مالکان اور بی سی سی آئی کے درمیان بدھ کو ہونے والی میٹنگ میں کیا۔ اس کے ساتھ ہی انہوں نے غیر ملکی کھلاڑیوں کے لیے آئی پی ایل سے قبل بڑی نیلامی کے لیے رجسٹریشن کو لازمی قرار دینے کا مطالبہ کیا ہے۔ انہوں نے کہا کہ کھلاڑیوں کی عدم دستیابی ان کی کارکردگی پر بھی اثر انداز ہوتی ہے کیونکہ ٹیم کی حکمت عملی ان غیر ملکی کھلاڑیوں کو مدنظر رکھ کر بنائی جاتی ہے۔انہوں نے کہا کہ اگر بورڈ کی جانب سے کھلاڑیوں کو انٹرنیشنل کرکٹ کھیلنے کا کہا جائے، یا وہ زخمی ہو جائیں یا کسی خاندانی کام کی وجہ سے ٹیم میں شامل نہ ہو سکیں تو ایسی صورت میں وہ کھلاڑیوں کو اجازت دے سکتے ہیں لیکن کھلاڑیوں کی عدم دستیابی کا پتہ انہیں نیلامی کے وقت پتہ چل جائے تو زیادہ بہتر ہوگا۔ انہوں نے کہا کہ کئی بار جو کھلاڑی بنیادی قیمت پر خریدے جاتے ہیں وہ نیلامی کے بعد اپنے نام واپس لے لیتے ہیں۔ انہوں نے ایک کھلاڑی کی مثال بھی دی جس میں کھلاڑی کے منیجر نے شرط رکھی تھی کہ اگر اسے زیادہ رقم دی جائے تو کھلاڑی کھیلنے کے لیے تیار ہو جائے گا۔ انہوں نے یہ بھی کہا کہ گزشتہ دو نیلامی سائیکلوں (24-2018) کے دوران کئی ایسے واقعات ہوئے ہیں جب بڑی نیلامیوں میں غیر ملکی کھلاڑی دستیاب نہیں تھے تاکہ چھوٹی نیلامی میں بڑی رقم حاصل کی جا سکے۔ انہوں نے کہا کہ کچھ کھلاڑی اور ان کے مینیجر اس نظام سے فائدہ اٹھانے کی کوشش کرتے ہیں اور ایسی صورتحال میں اس کو روکنے کے لیے کچھ الزامات کرنے کی ضرورت ہے۔
