دبئی، (یواین آئی )پاکستان کی اسٹار اسپنر سعدیہ اقبال نے جنوبی افریقہ کے خلاف حالیہ ٹی ٹوئنٹی سیریز میں شاندار بالنگ کے بعد آئی سی سی رینکنگ میں دوبارہ پہلی پوزیشن حاصل کر لی ہے۔ انہوں نے آسٹریلیا کی اینابیل سدرلینڈ اور ہندوستان کی دیپتی شرما کو پیچھے چھوڑتے ہوئے ٹاپ پوزیشن پر قبضہ جمایا۔ سعدیہ اقبال نے سیریز کے آخری اور فیصلہ کن میچ میں 18 رنز دے کر 3 وکٹیں حاصل کی تھیں، جو پاکستان کی فتح میں کلیدی ثابت ہوئیں۔پاکستانی کپتان فاطمہ ثناء نے بھی آل راؤنڈ کارکردگی کی بدولت رینکنگ میں نمایاں ترقی کی ہے۔ وہ بیٹنگ رینکنگ میں 31 درجے بہتری کے ساتھ مشترکہ طور پر 28 ویں نمبر پر آ گئی ہیں، جبکہ آل راؤنڈرز کی فہرست میں پانچ درجے ترقی کے بعد چھٹے نمبر پر پہنچ گئی ہیں۔ سیریز کے آخری میچ میں انہوں نے 30 گیندوں پر 47 رنز کی ناقابلِ شکست اننگز کھیلی اور دو اہم وکٹیں بھی حاصل کیں۔آسٹریلیا کے خلاف سڈنی میں کھیلے گئے پہلے ٹی ٹوئنٹی میچ کے بعد ہندوستانی بالرز نے بھی اپنی پوزیشن بہتر کی ہے۔ فاسٹ بالر رینوکا سنگھ 6 درجے بہتری کے ساتھ پانچویں نمبر پر آ گئی ہیں، جبکہ اروندھتی ریڈی 19 درجے چھلانگ لگا کر 16 ویں پوزیشن پر پہنچ گئی ہیں۔ اسپنر شری چرنی بھی 8 درجے بہتری کے ساتھ 39 ویں نمبر پر آ گئی ہیں۔
