ریاض :سعودی عرب کے مکہ مکرمہ ریجن میں گزشتہ روز ہونے والی موسلا دھار بارشوں کے نتیجے میں آنے والے سیلابی ریلے میں تین بہن بھائی زندگی کی بازی ہار گئے جبکہ ایک لاپتہ ہوگیا۔سعودی خبر رساں ادارے سبق نیوز کے مطابق سیکورٹی حکام اور امدادی ٹیموں کی جانب سے لاپتہ ہونے والے بچوں کی تلاش کا کام شروع کردیا گیا ہے۔
مکہ مکرمہ کے المغمس کے علاقے میں چاروں بچے گاڑی میں تھے جو سیلابی ریلے میں بہہ گئے۔ تین بچے ہلاک جبکہ ایک لاپتہ ہوگیا۔امن عامہ کی ٹیمیں چوتھے بچے کی تلاش کا کام چوبیس گھنٹے جاری رکھے ہوئے ہیں، اطراف کے علاقوں میں بھی سرچ آپریشن کا عمل جاری ہے۔واضح رہے کہ سعودی محکمہ شہری دفاع نے 4 ستمبر سے اتوار تک مملکت کے کئی علاقوں میں گرج چمک کے ساتھ موسلا دھار بارشوں کا امکان ظاہر کیا تھا۔محکمہ شہری دفاع نے عوام سے احتیاطی تدابیر اختیار کرنے، محفوظ مقامات پر رہنے، سیلابی مراکز، وادیوں اور نشیبی مقامات کی طرف جانے سے منع کیا تھا۔بیان میں کہا گیا تھا کہ مملکت میں ہونے والی تیز بارشوں کے دوان میڈیا اور سوشل نیٹ ورکنگ سائٹس کے ذریعے دی جانے والی ہدایات پر عمل کریں۔
