برسبین: کپتان پیٹ کمنز (سات وکٹ) کی قیادت میں گیند بازوں کی شاندار کارکردگی کی بدولت آسٹریلیا نے اتوار کو پہلے ٹیسٹ میں جنوبی افریقہ کو چھ وکٹوں سے شکست دے دی۔ گیندبازوں کے لئے مددگارپچ پر جنوبی افریقہ 99 رنز پر آل آؤٹ ہو گئی اور آسٹریلیا کو 34 رنوں کا ہدف دیا۔ آسٹریلیا نے یہ ہدف دوسرے دن چار وکٹوں کے نقصان پر حاصل کر لیا۔میچ کے پہلے دن 15 وکٹیں گرنے کے بعد دوسرے دن بھی مجموعی طور پر 19 وکٹیں گریں۔ آسٹریلیا نے دن کے آغاز میں پہلی اننگ کو 145 رنوں سے آگے بڑھاتے ہوئے مزید 73 رنز جوڑے ۔ ٹریوس ہیڈ نے سب سے زیادہ 92 رنز بنائے ۔ ہیڈ نے اپنی 96 گیندوں کی اننگ میں 13 چوکے اور ایک چھکا لگایا۔ اس کے علاوہ کیمرون گرین نے 18، ایلکس کیری نے 22 جبکہ مچل اسٹارک نے 14 رنز بنائے اور آسٹریلیا کی ٹیم 218 رنز پر آل آؤٹ ہوگئی۔پہلی اننگ میں 66 رنز سے پیچھے رہنے کے بعد جنوبی افریقہ نے دوسری اننگ میں ہتھیار ڈال دیے اور پوری ٹیم صرف 99 رنز پر ڈھیر ہو گئی۔ کھایا زونڈو نے 85 گیندوں پر چھ چوکوں کی مدد سے 36 رن کی اننگ کھیلی لیکن انہیں کسی کا ساتھ نہیں ملا۔کمنز نے دوسری اننگ میں پانچ وکٹیں حاصل کیں۔ اسٹارک اور بولانڈ کو دو دو وکٹ ملے ، جبکہ نیتھن لیون کو ایک کامیابی ملی۔تاہم آسٹریلیا کے لیے 34 رنز کا ہدف آسان نہیں رہا اور اس نے اس اسکورتک پہنچنے سے پہلے ہی چار وکٹیں گنوا دیں۔ عثمان خواجہ (دو)، ڈیوڈ وارنر (تین) اور اسٹیو اسمتھ (چھ) دہائی کا ہندسہ چھوئے بغیر ہی پویلین لوٹ گئے ، جبکہ ہیڈ صفرپر آؤٹ ہوئے ۔ مارنس لیبوشن پانچ رن بنا کر ناٹ آؤٹ رہے جبکہ آسٹریلیا نے 19 اضافی رنز کے ساتھ ہدف کوحاصل کرلیا۔اس جیت کے ساتھ ہی آسٹریلیا نے تین میچوں کی سیریز میں 1-0 کی برتری حاصل کر لی ہے ۔ سیریز کا دوسرا میچ 26 دسمبر سے میلبورن کرکٹ گراؤنڈ میں کھیلا جائے گا۔
