سید پرویز قیصر
انیس سال سے کم عمر عالمی کپ میں سپر چھ میں ہندوستان کی ٹیم اپنا اگلا میچ روایتی حریف پاکستان کے خلاف بلاوایو کے کوئین اسپورٹس کلب میں اتوار(یکم فروری) کو کھیلے گی۔ ہندوستان اور پاکستان کی انیس سال سے کم عمر ٹیموں کے درمیان عالمی کپ میں یہ گیارہواں اور کل ملاکر30 واں ایک روزہ بین الاقوامی میچ ہوگا۔
ابھی تک ان دونوں کے درمیان جو29 ایک روزہ بین الاقوامی میچ ہوئے ہیں اس میں ہندوستان نے16 میچوں میں اور پاکستان نے12 میچوں میں جیت اپنے نام کی ہے۔ دونوں کے درمیاں ایک میچ ٹائی بھی رہا ہے۔ ہندوستان کا ریکارڈ پاکستان کے خلاف انیس سال سے کم عمر کھلاڑیوں کے ایک روزہ بین الاقوامی کرکٹ میں بھلے ہی اچھا ہے لیکن عالمی کپ میں دونوں کا حساب برابر ہے۔ دس میں سے پانچ میچ پاکستان نے اور پانچ میچ ہندوستان نے جیتے ہیں۔
ہندوستان اور پاکستان کی انیس سال سے کم عمر کھلاڑیوں کی ٹیموں کے درمیان جو آخری پانچ ایک روزہ بین الاقوامی میچ ہوئے ہیں اس میں پاکستان نے چار میچوں میں کامیابی حاصل کی ہے جبکہ ایک میچ ہندوستان کی ٹیم جیتنے میں کامیاب رہی ہے۔ دونوں کے درمیان کو آخری ایک روزہ بین الاقوامی میچ ہوا تھااس میں جیت پاکستان نے اپنے نام کی تھی۔ دوبئی میں21 دسمبر2025 کو ہوئے ایشیا کپ کے فائنل میں پاکستان کی ٹیم نے پہلے بلے بازی کرتے ہوئے مقررہ50 اوور میں آٹھ وکٹ پر 347 رن بنائے تھے۔ سمیر منہاس نے113 بالوں پر17 چوکوں اور نو چھکوں کی مدد سے172 رن بنائے تھے جس کی بدولت پاکستان کا اتنا بڑا اسکور ممکن ہوسکا تھا۔ ہندوستان کے سبھی کھلاڑی26.2 اوور میں156 رن بناکر آوٹ ہوئے تھے جس کی وجہ سے اسے شکست ہوئی تھی۔ تیز بالر علی رضا نے6.2 اوور میں42 رن دیکر چار کھلاڑیوں کو آوٹ کیا تھا۔
پاکستان کا ہندوستان کے خلاف سب سے بڑا اسکورمقررہ50 اوور میں آٹھ وکٹ پر 347 رن ہے جو اس نے دوبئی میں21 دسمبر2025 کو ہوئے ایشیا کپ کے فائنل میں بنایا تھا۔ ہندوستان کا پاکستان کے خلاف سب سے زیادہ اسکور50 اوور میں آٹھ وکٹ پر314 رن ہے جو اس نے شارجہ میں4 جنوری2014 کو بنایا تھا۔
پاکستان کے سبھی کھلاڑی کرایسٹ چرچ میں30 جنوری 2018 کوہوئے میچ میں29.3 اوور میں69 رن بناکر آوٹ ہوئے تھے جو اسکا ہندوستان کے خلاف سب سے کم اسکور ہے۔ ہندوستان کا پاکستان کے خلاف سب سے کم18.5 اوور میں71 رن ہے جو اس نے کولمبو میں19 فروری2006 کو بنایا تھا۔
سمیر منہاس نے113 بالوں پر17 چوکوں اور نو چھکوں کی مدد سے172 رن بنائے تھے جو پاکستان کی جانب سے ہندوستان کے خلاف سب سے بڑا انفرادی اسکور ہے۔ ہندوستان کی جانب سے پاکستان کے خلاف سب سے بڑا انفرادی اسکور بنانے کا ریکاڑد جتن پرانجپائے کے پاس ہے جنہوں نے کولکاتہ میں 19 جنوری 1990 کو ہوئے میچ میں آوٹ ہوئے بغیر139 رن بنائے تھے۔
سمت شرما نے لاہور میں24 ستمبر2006 کو ہوئے میچ میں نو اوور میں36 رن دیکر پانچ کھلاڑیوں کو آوٹ کیا تھا جو پاکستان کے خلاف ہندوستان کی جانب سے سب سے اچھی بالنگ کارکردگی ہے۔ ہندوستان کے خلاف پاکستان کی جانب سے سب سے اچھی بالنگ کا ریکارڈ انوار علی کے پاس ہے جنہوں نے کولمبو میں19 اکتوبر2006 کو ہوئے میچ میں نو اوور میں35 رن دیکر پانچ کھلاڑیوں کو آوٹ کیا تھا۔
