سید پرویز قیصر
ہندوستان نے برج ٹاون میں کھیلے گئے فائنل میں جنوبی افریقہ کو سات رن سے شکست دیکر دوسری مرتبہ ٹونٹی ٹونٹی عالمی کپ جیتا۔ٹاس جیت کر پہلے بلے بازی کرتے ہوئے ہندوستان نے مقررہ 20 اوور میں سات وکٹ پر 176رن بنائے تھے۔ وراٹ کوہلی نے87 منٹ میں59 بالوں پر چھ چوکوں اور دو چھکوں کی مدد سے 76 رن بنائے۔ ہندوستان کا یہ اسکور ٹونٹی ٹونٹی فائنل میں سب سے زیادہ اسکور تھا۔ اس سے پہلے ٹونٹی ٹونٹی عالمی کپ میں سب سے بڑا اسکور بنانے کا اعزاز آسڑیلیا کے پاس تھا جس نے نیوزی لینڈ کے خلاف دوبئی میں14 نومبر2021 کو ہوئے فائنل میں18.5 اوور میں دو وکٹ پر173 رن بنائے تھے۔ جنوبی افریقہ نے مقررہ 20 اوور میں آٹھ وکٹ پر 169 رن بنائے جسکی وجہ سے اسے سات رن سے شکست ہوئی۔ جنوبی افریقہ کی جانب سے ہنریچ کلاسن نے 33 منٹ میں27 بالوں پر دو چوکوں اور پانچ چھکوں کی مد د سے52 رن بنائے۔ جنوبی افریقہ کو 24 بالوں پر 26 رن کی ضرورت تھی اور اسکے پانچ کھلاڑی آوٹ ہونے باقی تھے۔ہنریچ کلاسن جنہوں نے اکشر پٹیل کے ایک اوور میں دو وائیڈ بال سمت24 رن بناکر میچ کا رخ پلٹا تھا، ہاردک پانڈیہ کی تقریبا وائیڈ بال کو کھیلنے کی کوشش میں وکٹ کیپر ریشبھ پنت کو کیچ دے بیٹھے جس کے بعد ہندوستان نے میچ پر قابو پالیا۔ وراٹ کوہلی کو مین آف دی میچ ایوارڈ ملا۔ وہ پورے ٹورنامنٹ میں اتنے رن بنانے میں کامیاب نہیں ہوئے تھے جتنے انہوں نے فائنل میچ میں بنائے۔
ٹونٹی ٹونٹی عالمی کپ میں ابھی تک کھیلے گئے نو فائنل میچوں میں آٹھ مرتبہ وہ ٹیم فاتح رہی ہے جس نے ٹاس جیتا تھا۔ ٹاس جیتنے کے بعد فائنل میں شکست کھانے والی واحد ٹیم سری لنکا کی ہے جس کو پاکستان کے خلاف لارڈز میں 2009 میں ٹاس جیتنے کے بعد شکست ہوئی تھی۔ اس فائنل میں پاکستان نے8 وکٹ سے جیت اپنے نام کی تھی۔
پہلے بلے بازی کرتے ہوئے فائنل میچ جیتنے والی ہندوستان تیسری ٹیم ہے۔ اس سے پہلے2007 میں ہندوستان نے پاکستان کے خلاف اور 2012 میں ویسٹ انڈیز نے سری لنکا کے خلاف پہلے بلے بازی کرتے ہوئے فائنل میں جیت اپنے نام کی تھی۔
ہندوستان دو مرتبہ ٹونٹی ٹونٹی عالمی کپ جیتنے والی تیسری ٹیم بنی۔ہندوستان نے پہلی مرتبہ ٹونٹی ٹونٹی عالمی کپ جنوبی افریقہ میں2007 میں جیتا تھا تب اس نے جوہانسبرگ میں کھیلے گئے فائنل میں پاکستان کو پانچ رن سے شکست دی تھی۔
دو مرتبہ ٹونٹی ٹونٹی عالمی کپ جیتنے والی پہلی ٹیم ویسٹ انڈیز تھی۔ اس نے پہلی مرتبہ ٹونٹی ٹونٹی عالمی کپ کولمبو میں2012 میں ہوئے فائنل میں میزبان سری لنکا کو36 رن سے شکست دیکر خطاب پر قبضہ کیا تھا جبکہ2016 میں کولکاتہ میں کھیلے گئے فائنل میں اس نے انگلینڈ کو چار وکٹ سے شکست دیکر دوسری مرتبہ ٹونٹی ٹونٹی عالمی کپ جیتا تھا۔ میچ کے آخری اوور میں پہلی چار بالوں پر چار چھکے لگاکر کارلوس برتھویٹ نے اپنی ٹیم کو جیت دلائی تھی۔ انگلینڈ نے برج ٹاون میں 2010 میں کھیلے گئے فائنل میں آسڑیلیا کو سات وکٹ سے شکست دیکر پہلی مرتبہ ٹونٹی ٹونٹی عالمی کپ جیتا تھا جبکہ 2022 میں ملبورن میں ہوئے فائنل میچ میں اس نے پاکستان کے خلاف چھ وکٹ سے کامیابی حاصل کرکے دوسری مرتبہ ٹونٹی ٹونٹی عالمی کپ کا خطاب جیتا تھا۔
