بلوایو، ( یو این آئی )ہینل پٹیل کی قیادت میں گیندبازوں کی زبردست کارکردگی کے سبب ہندوستان نے انڈر-19 ورلڈ کپ کے اپنے پہلے میچ میں امریکہ کو 35.2 اوورز میں محض 107 رنز پر آل آؤٹ کر دیا۔یہاں کھیلے گئے مقابلے میں ہندوستانی انڈر-19 ٹیم نے ٹاس جیت کر پہلے گیندبازی کا فیصلہ کیا، جو مکمل طور پر درست ثابت ہوا۔ بلے بازی کے لیے اتری امریکی ٹیم کی شروعات انتہائی خراب رہی اور دوسرے ہی اوور میں امریندر گل (1) ہینل پٹیل کی گیند پر آؤٹ ہو گئے۔اس کے بعد ارجن مہیش اور ساحل گرگ نے اننگز کو سنبھالنے کی کوشش کی، تاہم ہندوستانی گیندبازوں کے دباؤ کے سامنے زیادہ دیر نہ ٹھہر سکے۔ دونوں بلے باز 16-16 رنز بنا کر پویلین لوٹ گئے۔ ادنیت جھانب نے 18 رنز کی اننگز کھیلی، لیکن وہ بھی آؤٹ ہو گئے۔امریکی ٹیم کے بقیہ سات بلے باز دہائی کے ہندسے تک بھی نہ پہنچ سکے۔ اننگز کے 36ویں اوور میں گیندبازی کرتے ہوئے ویبھو سوریہ ونشی نے دوسری ہی گیند پر نیتیش سدینی کو آؤٹ کر کے امریکہ کی اننگز کا اختتام 107 رنز پر کر دیا۔ نیتیش سدینی نے ٹیم کی جانب سے سب سے زیادہ 36 رنز بنائے۔ ہندوستان کی جانب سے ہینل پٹیل نے شاندار گیندبازی کا مظاہرہ کرتے ہوئے سات اوورز میں صرف 16 رنز دے کر پانچ وکٹیں حاصل کیں۔ اس کے علاوہ دیپیش دیویندرن، امبرش، کھلن پٹیل اور ویبھو سوریہ ونشی نے ایک، ایک وکٹ حاصل کی۔
