مظفرپور: سڑک حادثات میں مسلسل اضافہ کو دیکھتے ہوئے انڈس ٹاور مظفرپور زون کی جانب سے سڑک تحفظ اور احتیاط کے حوالے سے ایک بیداری مہم چلائی گئی۔ یہ مہم اے او ایم نتیشور شاہی کی قیادت میں مظفرپور کے قریب جھپہاں میں منعقد کی گئی، جس میں زون کے ٹیکنیشنوں کو سڑک تحفظ، محفوظ ڈرائیونگ اور حادثات سے بچاؤ کے موضوع پر تفصیلی تربیت دی گئی اور احتیاط و ذمہ داری کا عہد دلایا گیا۔اے او ایم نتیشور شاہی نے کہا کہ سڑک پر گاڑی چلانا صرف روزمرہ کی ضرورت نہیں بلکہ ایک بڑی ذمہ داری بھی ہے۔ انہوں نے کہا کہ “ہماری معمولی سی لاپروائی نہ صرف ہمارے لیے بلکہ ہمارے اہلِ خانہ اور دیگر لوگوں کے لیے بھی جان لیوا ثابت ہو سکتی ہے، اس لیے ہر حال میں محتاط اور منظم رہنا ضروری ہے۔”انہوں نے ٹیکنیشنوں کو بتایا کہ جلد بازی، حدِ رفتار سے تجاوز، موبائل فون کا استعمال، ہیلمٹ یا سیٹ بیلٹ نہ پہننا جیسی لاپروائیاں سنگین حادثات کا سبب بنتی ہیں۔ سڑک پر نکلنے سے پہلے گاڑی کی جانچ، بریک، اِنڈیکیٹر اور لائٹس کی درستگی کو یقینی بنانا بھی حفاظت کا اہم حصہ ہے۔انہوں نے کہا کہ مقررہ رفتار کی حد کی سختی سے پابندی کریں۔ دو پہیہ گاڑی چلاتے وقت معیاری ہیلمٹ لازمی پہنیں۔ چار پہیہ گاڑی میں ڈرائیور اور مسافروں کے لیے سیٹ بیلٹ لازمی ہے۔ گاڑی چلاتے وقت جوتا پہنیں تاکہ بریک اور کلچ پر مکمل کنٹرول رہے۔ نشے کی حالت میں گاڑی ہرگز نہ چلائیں۔ ڈرائیونگ کے دوران موبائل فون کے استعمال سے گریز کریں۔ ٹریفک اشاروں اور قوانین کی مکمل پابندی کریں۔مہم کے تحت جھپہاں واقع این ایچ22 پر خصوصی بیداری پروگرام چلایا گیا۔ اس دوران بغیر ہیلمٹ دو پہیہ گاڑی چلانے والوں کو روک کر ہیلمٹ کی اہمیت سمجھائی گئی، جبکہ چار پہیہ گاڑی چلانے والوں کو سیٹ بیلٹ باندھنے کی تاکید کی گئی۔عوام کو واضح پیغام دیا گیا کہ: “آپ کی حفاظت ہی آپ کے خاندان کی حفاظت ہے۔ آپ کی ایک غلطی آپ کے اپنوں کی زندگی کو خطرے میں ڈال سکتی ہے۔”مہم کے دوران لوگوں نے سڑک تحفظ کے اصولوں پر عمل کرنے کا عہد بھی کیا۔ موقع پر ایف ایس ای دھرمویر کمار، پرتاپ سنگھ، نندن کمار، محترمہ راج لکشمی، ببلو کمار ساہو، دیپک کمار، ٹیکنیشن وشنوکانت کمار، سمرجیت کمار، راجیش کمار، سانو، شترودھن کمار سمیت دیگر افراد موجود تھے۔ سبھی نے عہد کیا کہ وہ سڑک تحفظ کو اپنی روزمرہ زندگی میں اپنائیں گے اور سماج میں اس کے تئیں بیداری پھیلائیں گے۔آخر میں اے او ایم نتیشور شاہی نے کہا کہ اس مہم کا مقصد صرف ٹیکنیشنوں ہی نہیں بلکہ عام لوگوں کو بھی یہ سمجھانا ہے کہ سڑک تحفظ محض قوانین کی پابندی نہیں بلکہ انسانی جان کے تحفظ کا سب سے مؤثر ذریعہ ہے۔ احتیاط، برداشت اور ذمہ داری کے ساتھ گاڑی چلا کر ہی حادثات پر قابو پایا جا سکتا ہے۔
