ایران میں اراکینِ اسمبلی نے اہم اقدام اُٹھاتے ہوئے حجاب بل میں تبدیلی کی درخواست کر دی۔بین الاقوامی خبر رساں ادارے کی رپورٹ کے مطابق قانون سازوں نے حجاب بل میں ترمیم کرنے کی درخواست کی ہے، اس بل کے تحت لازمی حجاب نہ پہننے والی خواتین کے لیے سخت سزائیں تجویز کی گئی ہیں۔
پارلیمان کے ارکان کی جانب سے ملک میں خواتین کے حجاب اوڑھنے کے لازمی قانون کو نرم کرنے اور اس سلسلے میں سخت سزاؤں کے خاتمے کا مطالبہ کیا گیا ہے۔ایرانی میڈیا کے مطابق حجاب بل پارلیمنٹ میں منظور ہو چکا ہے لیکن حتمی توثیق کے لیے اسے ابھی تک حکومت کو پیش نہیں کیا گیا ہے۔ایران کے نائب صدر برائے پارلیمانی امور شہرام دبیری کی جانب سے بل کو منظوری کے لیے بھیجنے سے روکنے کی درخواست کی گئی ہے۔رپورٹس کے مطابق شہرام دبیری کی جانب سے یہ واضح نہیں کیا گیا کہ وہ کس قسم کی ترامیم کی خواہش رکھتے ہیں اور ترامیم کا یہ عمل کتنے وقت میں مکمل ہوگا۔
