عشرت جہاں کی راہل گاندھی کر رہے ہیں پیروی

نئی دہلی،24دسمبر،سماج نیوز سروس:دہلی میں آئندہ ہونے والے اسمبلی انتخابات کے لیے کانگریس پارٹی کی جانب سے امیدواروں کی پہلی لسٹ جاری کر دی گئی ہے۔جبکہ دوسری لسٹ بھی جلد جاری کر دی جائے گی۔ اوکھلا اسمبلی حلقہ اچانک سرخیوں میں آگیا ہے۔ کیونکہ کانگریس کے سینئر لیڈر اور ممبر پارلیمنٹ راہل گاندھی نے اوکھلا سے عشرت جہاں کو امیدوار بنانے کی پیروی کی ہے اور کہاہے کہ دہلی اسمبلی حلقہ سے عشرت جہاں کو کانگریس پارٹی کا امیدوار بنایاجائے کیونکہ عشرت جہاں بہت جھوجھارو ہیں اور نڈر بھی ہیں۔ عشرت جہاں نے نمائندے سے بات کرتے ہوئے بتایا کہ گذشتہ اکتوبر کے مہینے میں ہی سینئرلیڈر اور ممبر پارلیمنٹ راہل گاندھی سے ملاقات ہوئی تھی۔ جس میں انہوں نے مجھ سے الیکشن لڑنے کے لیے کہا تھا۔ اور میں نے بھی کہا تھا کہ پارٹی اگر ان کو کالے پانی سے بھی الیکشن لڑائے گی تو وہ تیار ہیں۔ عشرت جہاں کا کہنا ہے کہ مسلمانوں کے مسائل حل کرنے کے لیے اور خاص طور پر فرقہ پرست طاقتوں کو ناکام کرنے کے لیے راہل گاندھی فرنٹ فٹ پر کھیل رہے ہیں۔ اور میرے لیے تو انہوں نے خود کمان سنبھالی ہے۔ میرے والد (سسر) میرے ساتھ ہیں۔ کچھ لوگ غلط فہمی پھیلانے کی کوشش کر رہے ہیں۔ راہل گاندھی نے مجھے بلا کر رائے معلوم کی تھی اور میں نے دو ٹوک کہہ دیا تھا کہ آپ جہاں سے چاہیں مجھے الیکشن لڑائیں۔جیسے ہی راہل گاندھی کا بیان وائرل ہوا کچھ لوگ میری سسرال جھانکنے آگئے۔ عورتوں پر ہمیشہ ظلم ہوتا رہا ہے۔ کچھ لوگ کردار کو بہانا بنا کر الزام تراشی کرتے ہیں میرے تعلق سے جب کچھ نہیں ملا تو دوسری طرح کی افواہ اڑانی شروع کر دیں۔ ایک سوال کے جواب میں عشرت جہاں نے بتایا کہ این آر سی کے بارے میں نے دوسال تین ماہ کی جیل کاٹی ہے۔ وہ دن بہت مشکل میں گذارے ۔انہوں نے مزید بتایاکہ اسی معاملے میں بعد میں عدالت نے کہا کہ عشرت جہاں کا فساد سے کوئی تعلق نہیں ہے اور جہاں فساد ہوئے وہاں عشرت کی موجودگی یا کسی بھی طرح کا رابطہ نہیں ملتا ہے اور جہاں ان کی موجودگی جیسے کرشنا نگر میں مظاہرے ہوئے لیکن وہاں اب تک کوئی فساد نہیں ہوا۔ میں نے صرف اور صرف مسلمان ہونے کی سزا کاٹی ہے۔ اسی لیے عدالت نے مجھے دونوں کیسوں میں پاکی ضمانت دے دی۔آپ کو بتا دیں کہ جیل میں رہتے ہوئے ہی ان کا نکاح فرحان ہاشمی سے ہوا۔عشرت جہاں کا کہنا ہے کہ اوکھلا والوں کے لیے بہت سے کام اور ان کے حقوق دلانے کے لیے کام کرتی رہوں گی۔ انہوں نے کہا کہ آپ دیکھنا اس الیکشن میںکجریوال اینڈ کمپنی کے کئی وکٹ گریں گے۔