غزہ سے اسرائیلی فوج کا انخلا شروع، امریکہ نے سب سے بڑے بحری بیڑے کو واپس بلایا

غزہ :1 جنوری (:)ذرائع سے ملی خبروں کے مطابق اسرائیل نے غزہ سے پانچ فوجی بریگیڈ کو واپس ہٹا لیا ہے، یعنی اسرائیلی فوجیوں کا انخلاء شروع ہو گیا ہے ۔بتایا جا رہا ہے کہ غزہ میں اسرائیل اپنے آپریشن کے تیسرے مرحلہ میں داخل ہو چکا ہے۔ میڈیا رپورٹس میں اس تعلق سے جانکاری دی گئی ہے۔ رپورٹ کے مطابق امریکی قومی سیکورٹی پر مرکوز ایک پالیسی ریسرچ تنظیم انسٹی ٹیوٹ فار دی اسٹڈی آف وار نے کہا تھا کہ تیسرے مرحلہ میں جنگ کا اختتام ہوگا۔میڈیا رپورٹس کے حوالے سے اسٹڈی آف وار میں کہا گیا ہے کہ ’’تیسرے مرحلہ میں غزہ میں فوج میں کمی، ریزرو فوجیوں کی ریلیز، ہدف بند چھاپے اور انکلیو کے اندر ایک سیکورٹی بفر زون کا قیام شامل ہے۔‘‘ اس میں یہ بھی کہا گیا ہے کہ ایک نامعلوم اسرائیلی خفیہ افسر نے کہا ہے کہ حماس کا بیشتر کمانڈ اسٹرکچر ختم ہو گیا ہے اور حماس اب ایک فوجی ادارہ کی شکل میں کام نہیں کر رہا ہے۔واضح رہے کہ 7 اکتوبر کو حماس کے ذریعہ اسرائیل پر حملہ کرنے کے بعد اسرائیل نے 27 اکتوبر کو غزہ کے اندر ایک زمینی حملہ شروع کیا تھا جس میں کم از کم 21822 فلسطینی ہلاک ہوئے ہیں، جن میں بیشتر بچے اور خواتین ہیں، جبکہ 56451 فلسطینی زخمی ہوئے ہیں۔دریں اثنا اسی کے ساتھ یہ خبر بھی آرہی ہے کہ امریکہ نے غزہ میں جنگ اور خطے کی صورت حال کے پیش نظر اپنے سب سے بڑے طیارہ بردار بحری بیڑے کو واپس امریکہ لے جانے کا اعلان کر دیا ہے ۔ یہ اعلان اتوار کے روز سامنے آیا۔تاہم امریکی فوجی ترجمان نے کہا ہے اس بحری بیڑے کی واپسی کے بعد بھی امریکہ اس علاقے میں تباہ کن ہتھیاروں اور فوجی قوت کو برقرار رکھیگا ۔امریکہ کا سب سے بڑا جنگی اثاثہ جیرالڈ فورڈ طیارہ بردار سات اکتوبر سے شروع ہونے والی اسرائیل حماس جنگ کے فوری بعد امریکہ نے خطے میں اسرائیلی دفاع اور اپنے مفادات کے تفظ کے لئے بھیجا تھا لیکن اب اسے واپس بلا لیا گیا ہے اور جیرالڈ فورڈ اپنے بنیادی اور اصلی گھر نورفولک ورجینیا میں کچھ دیر رکے گا اور پھر اگلی منزلوں کی تیاری کرے گا۔جیرالڈ فورڈ نے بحیرہ روم میں دو ماہ سے زیادہ عرصہ گذارا ہے۔ اسکی واپسی سے پہلے اسے حوثیوں کے حملوں سے پیدا شدہ صورت حال کا سامنا رہا ۔ اسکی وجہ سے سمندری ٹریفک کو کافی تحفظ حاصل رہا۔امریکہ کی طرف سے بحری بیڑہ واپس لے جانے کے اعلان کے باوجود کوئی متعین تاریخ نہیں دی ہے کہ بحری بیڑہ کب امریکہ پہنچے گا۔ تاہم اس سے آنے والے دنوں میں امریکی اسٹریٹجی کی تبدیلی کا تاثر بن سکتا ہے۔ اگر ان دونوں خبروں کو ملا کر دیکھا جائے تو لگتا ہے کہ غزہ کے حوالے سے صورتحال بدل رہی ہے۔