شمالی غزہ کے آخری طبی مرکز کمال عدوان اسپتال کو اسرائیلی فورسز نے مریضوں اور عملے سے خالی کروا کر نذرآتش کر دیا۔غزہ کی وزارت صحت کے مطابق کمال عدوان اسپتال میں آگ نے اہم شعبہ جات کو جلا دیا ہے اور اب آگ باقی میڈیکل کمپلیکس تک پھیل رہی ہے۔
ٹیلیگرام پر ایک بیان میں، وزارت نے کہا کہ اسپتال ایک دم گھٹنے والے محاصرے کا شکار ہے، کیونکہ آپریشن اور سرجری کے شعبے، لیبارٹری، دیکھ بھال، ایمبولینس یونٹس اور گودام مکمل طور پر جل چکے ہیں۔بیان میں مزید کہا گیا کہ ’’آگ اب تمام عمارتوں تک پھیلنا شروع ہو گئی ہے۔اس میں یہ بھی کہا گیا، "قابض فوج ہتھیاروں اور بندوقوں کے بیرل کے خطرے کے تحت مریضوں اور زخمیوں کو زبردستی انڈونیشیا کے اسپتال منتقل کر رہی ہے، جہاں طبی سامان، پانی، ادویات، اور یہاں تک کہ بجلی اور جنریٹروں کی بھی کمی ہے۔”
وزارت نے کہا کہ اسرائیلی فوج نے کمال عدوان اسپتال پر اپنے حملے سے "شمالی غزہ میں صحت کے بقیہ نظام کو ایک مہلک دھچکا پہنچایا ہے”۔بیان میں یہ بھی اعلان کیا گیا ہے کہ شمالی غزہ میں کمال عدوان ہسپتال کے ڈائریکٹر ڈاکٹر حسام ابو صفیہ کو اسرائیلی فورسز کی جانب سے ان کی گرفتاری کے لیے "واضح اور براہ راست دھمکی” موصول ہوئی ہے۔
سعودی عرب نے اسرائیلی فورسز کی جانب سے غزہ کے ہسپتال کو نذرِ آتش کرنے اور مریضوں اور طبی عملے کو جبری طور پر نکالنے کی مذمت کی ہے۔
عرب نیوز کے مطابق ہسپتال کے حکام نے بتایا ہے کہ اسرائیلی فوج نے جمعے کو کمال عدوان ہسپتال پر چھاپہ مارا اور عملے کو باہر نکالا، ان کے کپڑے اتارے اور انہیں نامعلوم مقام پر لے گئے۔اس کے بعد اسرائیلی فوج نے ہسپتال کے کئی حصّوں کو آگ لگا دی۔ فلسطینی وزارت صحت کے مطابق یہ غزہ کی پٹی کے شمالی علاقے میں آخری فعال ہسپتال تھا۔
سعودی وزراتِ خارجہ نے ایک بیان میں کہا ہے کہ ’یہ کارروائیاں عالمی قانون، بین الاقوامی انسانی قانون اور سب سے بنیادی انسانی و اخلاقی اُصولوں کی خلاف ورزی ہیں۔‘
اسرائیل نے دعویٰ کیا ہے کہ حماس کے عسکریت پسند ہسپتال کے اندر سے چُھپ کر کارروائیاں کر رہے تھے تاہم، ہسپتال کے حکام نے اس الزام کی تردید کی ہے۔
دوسری جانب صحت کے حکام کا کہنا ہے کہ اسرائیلی فورسز نے شمالی غزہ کے ہسپتال کے ڈائریکٹر کو حراست میں لے لیا ہے۔
