نئی دہلی : کرناٹک میں کل بروز بدھ (10 مئی) اسمبلی انتخابات کے تحت ووٹ ڈالے جائیں گے ۔سبھی پارٹیاں اپنی پوری طاقت جھونکے ہوئے ہیں۔اس بار اسمبلی نتخابات میں بی جے پی لیڈروں کی پیشانی پر گھبراہٹ کی لکیریں بھی صاف جھلک رہی ہیں۔ حکمراں بی جے پی جماعت کا مقصد ریاست میں 38 سال سے جاری اقتدار مخالف لہر کو توڑنا اور لگاتار دوسری بار جیتنا ہے۔اس مقصد پر نگاہ مرکوز کئے بی جے پی ووٹروں میں اپنی مقبولیت منوانے کا کوئی موقع گنوانا نہیں چاہتی ۔بی جے پی نے اپنا آخری دائوبھی چل دیاہے ۔کرناٹک میں ووٹنگ سے ٹھیک ایک دن پہلے وزیر اعظم نریندر مودی نے ریاست کے لوگوں کو ایک خط جاری کیاہے ۔ مودی نے اسے اپنے آفیشل ٹویٹر ہینڈل سے شیئر کیا ہے۔ اس کے علاوہ انہوں نے ایک ویڈیو کے ذریعے بھی ووٹ دینے کی اپیل کی ہے۔اپنے خط میں جہاں مودی نے کچھ وعدے کئے تو وہیں اپنی پارٹی کی حصولیابیاں بھی گنائیں ۔وزیر اعظم مودی نے اپنے خط میں لکھا ’’کہ آپ نے ہمیشہ مجھ پر پیار اور محبت نچھاورکی ہے یہ میرے لیے ایک خدائی نعمت کی طرح لگتا ہے۔’آزادی کے امرت کال‘ میں، ہم ہندوستانیوں نے اپنے پیارے ملک کو ایک ترقی یافتہ قوم بنانے کا ہدف مقرر کیا ہے۔ کرناٹک اپنے مقصد اورویزن کو عملی جامہ پہنانے کے لیے تحریک کی قیادت کرنے کا خواہاں ہے۔انہوںنے لکھا ہے کہ ہندوستان پانچویں بڑی معیشت ہے، ہمارا اگلا ہدف ٹاپ تھری تک پہنچنا ہے۔ یہ تب ہی ممکن ہے جب کرناٹک تیزی سے ترقی کر کے 1 ٹریلین ڈالرکی معیشت بن جائے۔ اپنے خط میں انہوں نے کرناٹک کے عوام کے ساتھ اپنی پارٹی کی وابستگی کا بھی ذکر کیا۔وزیر اعظم نے لکھا کہ کرناٹک کو کووڈ-19 وبائی امراض کے دوران بی جے پی حکومت کے تحت غیر ملکی سرمایہ کاری کی شکل میں سالانہ 90,000 کروڑ روپے سے زیادہ حاصل ہوتے ہیں۔ پچھلی حکومت کے دوران یہ تقریباً 30,000 کروڑ روپے تھا۔ انہوں نے لکھا کہ ہم کرناٹک کو سرمایہ کاری، صنعت اور اختراع میں نمبر 1 اور تعلیم، روزگار اور انٹرپرینیورشپ میں نمبر 1 بنانا چاہتے ہیں۔دیہی اور شہری انفراسٹرکچر، ٹرانسپورٹ اور ملازمتوں سے متعلق خدشات کو دور کرتے ہوئے وزیر اعظم مودی نے لکھا کہ کرناٹک میں بی جے پی حکومت اگلی نسل کے شہری انفراسٹرکچر کی تعمیر، ٹرانسپورٹ کو جدید بنانے، دیہی اور شہری علاقوں میں معیار زندگی کو بڑھانے اور خواتین کو بااختیار بنانے کے لیے پرعزم ہے۔ نوجوانوں کے لیے مواقع پیدا کرنے کے لیے کام جاری رکھیں گے۔انہوںنے لکھا کہ ’کرناٹک کے ہر شہری کا خواب میرا خواب ہے‘‘۔وہیںمودی نے ٹویٹ کے کیپشن میں لکھا ہے کہ’’ پچھلے کچھ دنوں میں کرناٹک میں مجھے جو پیار ملا ہے وہ منفرد ہے۔ اس سے کرناٹک کو تمام شعبوں میں نمبر 1 بنانے کے عزم کو تقویت ملی ہے!اس کے علاوہ وزیر اعظم مودی نے اپنے ٹویٹ میں ایک الگ ویڈیو پیغام بھی شیئر کیا۔ اس میں انہوں نے کرناٹک کے لوگوں سے ریاست کو ‘نمبر-1’ بنانے کے لیے انتخابات کے دن ووٹ دینے کی بھی اپیل کی۔بتادیں کہ ہفتہ (6 مئی) کو، پی ایم مودی نے ریاست میں بی جے پی کی جارحانہ مہم کے ایک حصے کے طور پر بنگلورو میں 26 کلومیٹر کا روڈ شو کیا تھا، جو کہ ڈی کے شیوکمار اور سدارامیا کی قیادت میں کانگریس کر رہی ہے اور ایچ ڈی کمارسوامی کی قیادت میں جے ڈی ایس کے چیلنج سے نمٹنے کے لئے مانا جارہا ہے ۔قابل ذکر ہے کہ ریاست میں بی جے پی نے 224، کانگریس نے 223 اور جے ڈی ایس نے 207 امیدوار کھڑے کیے ہیں۔ کرناٹک میں 5.2 کروڑ اہل ووٹروں میں سے 9.17 لاکھ پہلی بار ووٹ ڈالیں گے۔ 224 سیٹوں والی کرناٹک اسمبلی کے لیے ووٹنگ بدھ (10 مئی) کو شروع ہوگی اور ووٹوں کی گنتی 13 مئی کو ہوگی۔
