نئی دہلی:دہلی ٹرانسپورٹ کارپوریشن (DTC) جلد ہی دہلی این سی آر میں مزید انٹرسٹی آپریشنز کے لئے پریمیم بسیں چلانے جا رہی ہے، اسکی اصولی منظوری DTC نے 09.01.2023 کو منعقدہ اپنی بورڈ میٹنگ میں دی ہے، اسکے علاوہ ڈی ٹی سی بورڈ نے ڈی ٹی سی ملازمین کو ای ٹو وہیلر کے استعمال کی حوصلہ افزائی کیلئے ڈی ٹی سی ڈپو میں مفت چارجنگ کی سہولت فراہم کرنے کی بھی منظوری دی ہے۔ ڈی ٹی سی ملازمین ای گاڑیوں کی خریداری کیلئے دہلی ای وی پالیسی 2020 کے پروویژن کے مطابق دہلی فائنانس کارپوریشن (ڈی ایف سی) کے ذریعے فہرست میں شامل مالیاتی اداروں سے قرض حاصل کرسکیںگے، ایک اور فیصلے میں بورڈ نے ڈی ٹی سی کے کنٹریکٹ ملازمین کو 03 قومی تعطیلات کا فائدہ دینے کی بھی منظوری دی ہے۔ڈی ٹی سی طویل عرصے سے طویل روٹس پر اعلیٰ معیار کی پریمیم بسیں متعارف کرانے کا منصوبہ بنا رہی ہے، ڈی ٹی سی بورڈ سے منظوری کے بعد الیکٹرک یا سی این جی پریمیم بسیں جلد ہی این سی آر کے روٹس پر 200 کلومیٹر تک چلائی جائیں گی، انٹر سٹی بس آپریشن کیلئے ڈی ٹی سی 200 کلومیٹر سے زیادہ کے روٹس پر بھارت اسٹیج (BS) VI بسیں چلائیگی، تمام بسیں سی سی ٹی وی، جی پی ایس، پینک بٹن اور دیگرجدیدسہولیات سے لیس ہوں گی تاکہ طویل فاصلے کے مسافروں کو آسان اور محفوظ سفر فراہم کیاجاسکے۔دہلی میں ای-گاڑیوں کو فروغ دینے کے مقصد کیساتھ ڈی ٹی سی بورڈ نے میٹنگ میں اپنے تمام ملازمین کو مفت چارجنگ کی سہولت فراہم کرنے کو بھی منظوری دی جنکے پاس الیکٹرک گاڑیاں ہیں، دہلی ای وی پالیسی میں 2 پہیوں والے حصے کو ترجیحی حصے میں رکھا گیا ہے، دہلی حکومت پہلے ہی 5,000 روپے فی کلو واٹ فی گاڑی کی بیٹری کی گنجائش والے 2 پہیہ گاڑی کی خریداری پر زیادہ سے زیادہ 30,000 روپے تک کی مراعات فراہم کر رہی ہے، ڈی ٹی سی کے ڈپو اور کارپوریٹ دفاتر میں تقریباً 38,000 ملازمین ملازم ہیں، حال ہی میں ڈی ٹی سی ملازمین کے درمیان ایک سروے کیا گیا جسمیں پایا گیا کہ 45% ملازمین دفتر آنے جانے کیلئے دو پہیہ گاڑیوں کا استعمال کرتے ہیں،الیکٹرک گاڑیوں کے مالکان کیلئے فاصلے کے خدشات اورگاڑیوں کی چارجنگ ایک بڑا چیلنج رہا ہے لیکن دفتر اور ڈی ٹی سی بس ڈپو میں مفت چارجنگ کی سہولیات کیساتھ ڈی ٹی سی ملازمین اب آسانی سے اپنی الیکٹرک گاڑیوں کو مفت چارج کر سکیں گے۔مزید برآں ڈی ٹی سی کے ملازمین جنکے پاس الیکٹرک ٹو وہیلر خریدنے کیلئے رقم نہیں ہے، وہ دہلی ای وی پالیسی 2020 کے پروویژن کے مطابق اب دہلی فنانشل کارپوریشن (DFC) کے ذریعے فہرست میںشامل مالیاتی اداروں سے قرض کی سہولت حاصل کر سکتے ہیں، پورے عمل کو آسان بنانے کیلئے ڈی ٹی سی بورڈ نے قرض کی رقم کی قسط کو ملازم کی تنخواہ سے براہ راست کٹوتی کرنے کے انتظام کو منظوری دے دی ہے۔ڈی ٹی سی بورڈ کے اجلاس میں ڈی ٹی سی کے کنٹریکٹ ملازمین کو 03 قومی تعطیلات (26 جنوری، 15 اگست اور 2 اکتوبر) کا فائدہ دینے کے حوالے سے ایک اور اہم فیصلہ کیا گیا، اب کنٹریکٹ ملازمین بھی ریگولر ملازمین کی طرح قومی چھٹی کے فوائدکے حقدار ہوں گے، اس سلسلے میں جون 2022 میں ایک کمیٹی تشکیل دی گئی جسکے ذریعے اس پر عمل درآمد کی سفارش کی گئی، ڈی ٹی سی ریگولر ملازمین (ٹریفک ملازمین)کو بنیادی تنخواہ اور ڈی اے کا 1.5 گنا ادا کرتا ہے اگر کوئی ملازم گزیٹڈ چھٹی پرڈیوٹی کرتا ہے، کمیٹی نے کنٹریکٹ ملازمین کیلئے بھی اسی طرح کی فراہمی کی سفارش کی تھی،دہلی کے وزیر ٹرانسپورٹ اور ڈی ٹی سی بورڈ کے چیئرمین کیلاش گہلوت نے کہاکہ وزیر اعلی اروند کیجریوال کی قیادت میں دہلی حکومت اپنے ملازمین اور دہلی کے شہریوں کو بہترین خدمات فراہم کرنے میں ہمیشہ سب سے آگے رہی ہے، طویل فاصلے کا سفر کرنے والے مسافروں کو ڈی ٹی سی کی نئی پریمیم بسوں میں بہترین سہولیات حاصل ہوں گی، مفت ای وی چارجنگ کی سہولیات اور کنٹریکٹ ملازمین کو 03 قومی چھٹیوں کا فائدہ ہمارے ملازمین کو بہترین سہولیات فراہم کرنے کے ہمارے عزم کی عکاسی کرتا ہے۔
