مناسک حج کا آغاز کل سے ہو رہا ہے رکن اعظم وقوف عرفات ہفتہ 15 جون کو ہوگا میدان عرفات سے خطبہ حج 50 زبانوں میں نشر کیا جائے گا۔
ایس پی اے کے مطابق سعودی حکومت نے امسال خطبہ حج اردو سمیت 50 زبانوں میں ترجمہ کر کے نشر کرنے کا فیصلہ کیا ہے جس کے لیے تمام تر انتظامات مکمل کر لیے گئے ہیں۔
مسجد الحرام اور مسجد نبوی ﷺ کے امور کے لیے جنرل پریذیڈنسی نے اعلان کیا ہے کہ عرفات کے خطبے کا ترجمہ پراجیکٹ اب 50 زبانوں پر مشتمل ہوگا اور خادم حرمین شریفین شاہ سلمان بن عبدالعزیز کی سرپرستی میں یہ اب تک کا سب سے بڑا ترجمہ پراجیکٹ ہوگا۔
خطبہ حج 50 زبانوں میں ترجمہ کرکے نشر کرنے سے ایک ارب سے زائد سامعین اس سے مستفید ہوسکیں گے۔سال 2018 میں پہلی بار پانچ بین الاقوامی زبانوں میں خطبہ حج کا ترجمہ نشر کیا گیا تھا جس کو بعد ازاں بڑھا کر 10 اور 2022 میں 14 زبانوں میں نشر کیا گیا تھا۔
گزشتہ سال اس کی تعداد بڑھا کر 20 کر دی گئی تھی اور اب ایک دہائی سے بھی کم عرصے میں 50 بین الاقوامی زبانوں میں ترجمہ نشر کرنے کے انتظامات کر لیے گئے ہیں۔ خطبہ حج سمارٹ موبائل فون، حرمین شریفین کی ویب سائٹ اور منارۃ الحرمین پلیٹ فارم کے ذریعے بھی پیش ہوگا۔ ان کا کہنا تھا کہ یہ اہم منصوبہ مملکت کے مذہبی روادری، اعتدال اور امن کے پیغام کو اجاگر کرنے،اسلام کی حقیقی تصویر اور اس کی اعلی اقدار کو ظاہر کرنے کی کوشش کرتا ہے۔
