بجلی کے تاروں سے نکلی چنگاری سے جنگل میں شعلے بھڑک اٹھے

دیوبند، سماج نیوز \سروس:دیوبند منگلور روڑکی روڑ پر شدید گرمی کے باعث بجلی کے تاروں میں آگ لگ گئی، تاروں میں لگی آگ سے نکلنے والی چنگاریوں سے جنگل میں بھی آگ لگ گئی اور سوکھے درختوں وگھاس میں لگنے والی آگ سے شعلے اٹھنے لگے جس کی وجہ سے آس پاس کے علاقہ میں دہشت اور افراتفری کا عالم پیدا ہوگیا۔ اس علاقہ کے لوگوں نے فوراً اس کی اطلاع فائر برگیڈ کو دی۔ اطلاع ملتے ہی فائر برگیڈ کا عملہ آگ بجھانے والی گاڑی لے کر موقع پر پہنچ گیا۔ فائر برگیڈ کے کارکنان نے بڑی مشقت کے بعد آگ پر قابو پایا۔ واضح ہو کہ ملک کے دیگر مقامات کی طرح دیوبند بھی اس وقت شدید گرمی کی زد میں ہے۔ صبح سویرے سے چلنے والی گرم لو کی وجہ سے لوگوں کے معمولات بہت زیادہ متأثر ہوئے ہیں، دن میں 12بجے کے بعد جیسے زندگی رک جاتی ہے شہر کے بازاروں میں سناٹا چھا جاتا ہے۔ لوگوں کا کہنا ہے کہ جمعرات کے روز منگلور روڑکی روڑ پر شدید گرمی کے باعث وہاں سے گزرنے والے تاروں میں آگ لگ گئی جس کی چنگاریوں سے جنگل میں آگ پھیلنا شروع ہوگئی ، چشم دید لوگوںکا کہنا ہے کہ تاروںمیں جس جگہ آگ لگی تھی وہاںنیچے بڑی تعداد میں نرسلیں کھڑی ہوئی تھیں جنہوں نے پلک زدن میں آگ پکڑلی اور دیکھتے ہی دیکھتے چاروں طرف آگ کے شعلے بھڑک اٹھے۔ اچھا یہ ہوا کہ آگ لگنے کی جگہ پر کوئی نہیں تھا ورنہ وہ بھی آگ کی زد میں آسکتا تھا لیکن پھر بھی اس طرح سے آگ لگ جانے کی وجہ سے علاقہ میں دہشت کا ماحول ہے۔ لوگوں کا کہنا ہے کہ شدید گرمی کے باعث جنگلوں کے درخت اورگھاس وغیرہ سوکھ چکے ہیں،ایسے میں آگ لگ جانے پر قابو پانا مشکل ہوجاتا ہے۔