دیوبند، 15؍ جون ,سماج نیوز سروس:صوبہ کرناٹک کے معروف تعلیمی ادارے ’شاہین ادارہ جارت بیدر سے ہر سال کی طرح اس سال بھی حفاظ طلبہ نے ’نیٹ‘ امتحان میں شرکت کرتے ہوئے بہترین تعلیمی مظاہرہ کیا، اس امتحان میں ملک بھر سے ہزاروں نہیں لاکھوں طلبہ نے شرکت کی تھی۔ ان میں طلبہ نے نہ صرف شاہین ادارہ جات میں بلکہ ملک بھرمیں ایک نمایاں کامیابی حاصل کی ہے۔نیٹ کے امتحان میں طلبہ کی کامیابی پر ملک کی مختلف علمی و ادبی، سماجی و اصلاحی شخصیات نے مسرت کا اظہار کیا۔اس سلسلے میں مبارک باد دیتے ہوئے مولانا ڈاکٹر عبدالمالک مغیثی سکریٹری شعبہ دینی تعلیم آل انڈیا ملی کونسل نے کہا کہ طلبہ و طالبات کے نیٹ امتحان میں اس طرح کی کامیابی پر میں شاہین ادارہ جات کے چیرمین ڈاکٹر عبدالقدیر کو مبارکباد پیش کرتا ہوں۔بالیقین ڈاکٹر عبدالقدیر نے علم کی شمع روشن کرکے جو کارہائے نمایاں انجام دئے ہیں اور دے رہے ہیں وہ قابِلِ ستائش اور قابلِ تقلید ہے۔ یہ کامیابی کی ایک بے مثال کہانی ہے جس کے پیچھے جدوجہد اور محنت کی کہانی، اساتذہ کے جذبے کی کہانی اور بزرگوں کی رہنمائی اور دعائوں کی کہانی ہے۔ اسی طرح انھوں نے حافظ محمد اعظم ابن مولانا آصف ندوی ناظم جامعہ کاشف العلوم چھٹمل پور و محمد فاضل ابن حکیم محمد عادل مرزا پور کی نیٹ امتحان میں کامیابی پر مسرت کا اظہار کرتے ہوئے کہا کہ نیٹ میں کامیاب ہونا آسان بات نہیں اس کے لئے لگاتار محنت اور تعلیم کی طرف رجحان درکار ہوتاہے ،بلا شبہ حافظ محمد اعظم اور محمد فاضل نے انتھک محنت، مطالعہ کرکے اور نیٹ پاس کرکے طالب علم ہونے کا حق ادا کیا ہے۔میں اس کے لئے انھیں مبارکباد پیش کرتا ہوں‘‘۔مولانا نے شاھین اکیڈمی مظفر نگر کے ڈائریکٹر مولانا محمد اکرم ندوی کو بھی شاہین اکیڈمی سے طلبہ کے کامیاب ہونے پر مبارکباد پیش کی اور اکیڈمی کے لئے نیک خواہشات کا اظہار کیا۔ اخیر میں انھوں نے کہا کہ میں دعا گو ہوں کہ تمام طلبہ و طالبات کو یوں ہی مسلسل کامیابیاں ملتی رہیں اور وہ سب ایسے ڈاکٹرز بنیں جن میں ایمانداری و انسانی ہمدردی کاجذبہ ہواور اپنے فرائض کو پوری ایمانداری کے ساتھ نبھائیں۔دوسری جانب گزشتہ منگل کے روز آئے نیٹ کے نتائج میں مسلم بچے اور بچیوں نے بھی خاطر خواہ کامیابی حاصل کی ہے ،جس کے بعد اب یہ بچے ایم بی بی ایس ڈاکٹر بن کر ملک و قوم کی خدمت کا فریضہ انجام دینگے۔اسی فہرست میں علاقہ کے دو طلباء نے نیٹ کا امتحان پاس کر کے اپنے اہل خانہ و علاقے کا نام روشن کیا ہے،خاص بات یہ ہے کہ یہ طلبہ مدارس کے فضلاء ہیں، ایک طالبعلم باقاعدہ عالم دین ہے جبکہ دوسرا حافظ قرآن ہے، جنہوں نے اپنی محنت و لگن کے سبب پہلی مرتبہ میں نیٹ کا امتحان پاس کرکے نہ صرف اپنے خاندان اور علاقہ کا نام روشن کیا بلکہ مدارس میں زیر تعلیم ان طلبہ کو ایک نئی امید اور حوصلہ بخشا ہے ،جو مستقبل میں بہتر ڈاکٹر بننے کے خواب دیکھ رہے ہیں۔قومی سطح پر آئے قومی اہلیت کم داخلہ ٹیسٹ یعنی NEET (UG) امتحان میں مدرسہ کاشف العلوم چھٹمل پور کے مہتمم مولانا آصف کے بیٹے مولاناحافظ محمد اعظم ملک نے 720 میں سے 642 نمبر حاصل کیے جبکہ مرزا پور کے رہنے والے حکیم حاجی محمد عادل کے بیٹے حافظ فضل ملک نے 720 میں سے 649 نمبر حاصل کئے ہیں دونوں طلبہ کی اس کامیابی سے اہل خانہ میں خوشی کی لہر دوڑ گئی ہے۔ اس نے نیٹ کا امتحان پاس کر کے اپنے خاندان اور علاقے کا نام روشن کیا ہے۔دونوں بچوں کی اس کامیابی علاقہ میں بھی خوشی کاماحول اور متعلقین انہیں مبارکباد پیش کرہے ہیں۔
