دیوبند، 23 جنوری،سماج نیوز سروس: آئندہ12 فروری کو دہلی کے رام لیلا میدان میں منعقد ہونے والے جمعیة علماءہند کے چونتیسویں اجلاس عام کے سلسلہ میں جمعیة علماءہند کے جنرل سکریٹری مولانا حکیم الدین قاسمی ضلع سہارنپور کے دورہ پر ہیں اور وہ متعدد مقامات پر جمعیة علماءہند کے عہدیدان و کارکنان سے ملاقات کرکے اجلاس کی تیاریوں کا جائزہ لینے کے ساتھ ساتھ اجلاس کی افادیت سے روشناس کراتے ہوئے اجلاس کو کامیابی سے ہمکنار کرانے کے لئے تعاون کی اپیل کی کررہے ہیں۔ اسی مناسبت سے آج سہارنپور کے کھاتہ کھیڑی میں واقع مدرسہ سراج العلوم رشیدیہ میں جمعیة علماءضلع ہری دوار اتراکھنڈ کی ایک میٹنگ منعقد ہوئی۔ جس کی صدارت مولانا محمد عارف قاسمی صدر جمعیة علماءاتراکھنڈ نے کی ۔ پروگرام کا آغازتلاوت کلام اللہ شریف اور نعت پاک سے ہوا۔اس موقع پرحاجی ماسٹر احسان الٰہی جنرل سیکریٹری جمعیة علماءاتراکھنڈ نے کہاکہ آئند 12فروری 2023 کو جمعیت علمائے ہند کا 34 واں اجلاس عام دہلی کے رام لیلا میدان منعقد ہونے جارہاہے ،جسے ہم سب کو اپنی محنتوں سے کامیاب بنانا ہے۔انہوں نے اجلاس کے سلسلہ میں کارگزاری پیش کرتے ہوئے بتایا کہ اتراکھنڈ سے ابھی تک تقریباً 40 بسیں ہوچکی اور مزید پچاس سے زائد بسیں تیار کرنی ہے۔اس موقع پرناظم عمومی مولانا محمد حکیم الدین قاسمی نے اجلاس عام کی تیاری کا جائزہ لیا اور خوشی کااظہار کرتے ہوئے سبھی حضرات کو جمعیة علماءسے جوڑنے کی اپیل کی ۔
انہوں نے جمعیة علماءہند اور اکابرین جمعیة کی قربانیوں کا تذکرہ کرتے ہوئے اجلاس عام کی افادیت پر روشنی ڈالی۔ انہوں نے ملک و ملت کے حالات بیان کئے اور کہاکہ درپیش چیلنجز کے سدباب کےلئے جمعیة علماءہند کے اجلاسوں نے ہمیشہ ملک و ملت کی رہنمائی کا فریضہ انجام دیاہے۔ انہوں نے اجلاس کی کامیابی کے لئے عوامی رابطہ مہم کو لازمی قرار دیا اور کارکنان وعہدیدان سے عوامی رابطہ سازی پر زور دیا۔ اس دوران مولانا محمد ہارون قاسمی صدر جمعیة علماءضلع ہری دوار نے دھلی جانے کے لئے اور اجلاس عام کو کامیاب بنانے کیلئے کمیٹی تشکیل دی۔ مولانا محمد عارف قاسمی نے بھی اپنے خیالات کا اظہارکرتے ہوئے اجلاس عام کو کامیاب بنانے کیلئے زیادہ سے زیادہ تعداد میں دہلی پہنچنے کی اپیل کی۔علاوہ ازیں مولانا نسیم احمد قاسمی جنرل سیکریٹری ضلع ہری دواراور مولانا محمد تبریز عالم قاسمی نے بھی اپنے خیالات کا اظہار کرتے ہوئے تمام مہمانوں کا شکریہ ادا کیا ۔قاری محمد شمیم قاسمی دامت دعاءپر پروکرام اختتام پذیر ہوا۔
