افسر علی نعیمی ندوی
بیدر۔ 25؍مئی، سماج نیوز سروس : پڑھنے کاشوق اصل ہے۔ طلبہ وطالبات پی یوسی کے بعد نصابی اور غیرنصابی کتابیں پڑھتے نظر آتے ہیں تو یہ ایک عمدہ بات ہوگی ۔ بھلے موبائل پر کتاب پڑھیں ، اپنے اندر کتاب پڑھنے کاشوق ہونا چاہیے۔ کیوں کہ پی یوسی اور ڈگری کے بعد ایک علم کی دنیا آپ کا استقبال کرتی ہے۔ اور یہی ٹاسک آپ کے لئے ہونا چاہیے کہ میں کتنی زیادہ کتابیں پڑھ سکتا؍پڑھ سکتی ہوں ۔ اسلئے کہ کئی طلبہ مدرسہ اور کالج سے فارغ ہوکر پڑھائی سے مطلب نہیں رکھتے۔ یہ باتیں مولانا محی الدین غازی فلاحی سکریڑی جماعت اسلامی ہندنے کہیں ۔ وہ آج ہفتہ کو رپٹن پی یواینڈڈگری انسٹی ٹیوٹ بیدر کے تعلیمی ادارے میں پی یوسی سال دوم کے کامیاب طلبہ اور ان کے والدین کوادارہ کی جانب سے تہنیت پیش کرنے کے بعد خطاب کررہے تھے۔ انھوں نے بتایاکہ طالب علم اس کو کہتے ہیں جس میں علم کی چاہت ہو۔ ایک سروے کے مطابق 15سال سے 25سال کے درمیان جو مطالعہ ہوتاہے وہی مطالعہ کا گولڈن ٹائم ہوتاہے ۔ ایک دن میں 300صفحات تک پڑھ سکتے ہیں لیکن اس کے بعد کی عمر (25تا75سال) کے درمیان اس قدر مطالعہ نہیں ہوتا۔ اس کی وجہ صحت اور دیگر مصروفیات ہوتی ہیں۔ طلبہ سے یہی کہناہے کہ کتابوں سے اپنے تعلق کو ختم نہ کریں۔ مختلف مضامین کی کتابیں پڑھیں ، مطالعہ سے قد اور شان بڑھتی چلی جائے گی۔انھوں نے طلبہ کو نصیحت کی کہ پیسہ کمانے کوزندگی کامشن نہ بنائیں۔ آپ کی زندگی کامشن سوسائٹی کو بہتر بنانا، انسانیت کو دکھوں سے نکالنا، پریشانیوں سے بچانا ہونا چاہیے۔ بڑے کام ہم جیسے لوگ ہی انجام دیتے ہیں۔ جناب محمدامجد حسین اڈمنسٹریٹر ادارہ نے اپنے خطاب میں کہاکہ رپٹن انسٹی ٹیوٹ میں کم سے کم فیس لی جاتی ہے۔ ہم نے بی ایس سی ڈگری (لڑکیوں) کے لئے شروع کیاہے۔ تاکہ حجاب کے مسائل حل ہوسکیں۔ ہمارے یہاںکمپیوٹرسائنس کورس بھی شروع کیاگیاہے۔ہمارے ہاں مخلوط تعلیم نہیں ہے۔ طلبہ اور طالبات کے لئے تعلیم کاعلیحدہ علیحدہ نظم ہے۔ پی یوسی سال دوم میں ٹاپ کرنے والے طلبہ اور طالبات کو تہنیت پیش کرنے کے علاوہ مولانا محی الدین غازی فلاحی اور محمد حامدعلی چیرمین ادارہ نے تمام لیکچررس کو شالپوشی ، گلپوشی اور توصیفی سند کے ذریعہ تہنیت پیش کی او ران کی تدریسی کوششوں کوسراہا۔تقریب کاآغازڈاکٹر محمد شمس الدین حکیم لیکچرر کے تلاوت ِکلام پاک سے تقریب کا آغاز عمل میں آیا۔ دہلی سے تشریف لائے مولانا محی الدین غازی سکریڑی جماعت اسلامی ہند کاتعارف جناب محمد معظم امیرمقامی جماعت اسلامی ہند بید رنے کیا۔ پرروگرام کی کارروائی جناب محمدیوسف رحیم بیدری اور محترمہ اُم سلمہ نے چلائی۔جب کہ ادارہ کے چیرمین جناب محمد حامد علی صاحب کے علاوہ رپٹن پی یو اینڈ ڈگری انسٹی ٹیوٹ بید ر کی تمام لیکچررس پروگرام میں موجودتھیں۔
اظہارتشکر پر تقریب اختتام کو پہنچی۔ جناب محمد مظہرالدین اور دیگر نے انتظامی امور کی دیکھ بھال کی ۔
تصویر منسلک ہے
