پنت ہندوستان لوٹے ، ممبئی میں طبی ماہرین سے رابطہ

ممبئی (یو این آئی) رشبھ پنت ہندوستان واپس آ گئے ہیں اور جلد ہی بحالی کے لیے بنگلورو میں سنٹر آف ایکسی لینس ( سی او ای) جائیں گے۔ 23 جولائی کو مانچسٹر میں انگلینڈ کے خلاف چوتھے ٹیسٹ کے دوران اپنے دائیں پاؤں میں فریکچر ہونے کے بعد وکٹ کیپر بلے باز نے گزشتہ چند دنوں میں ماہرین سے مشورہ کیا تھا۔جب کہ تشخیص کی تفصیلات کا ابھی انتظار ہے، ایسا لگتا ہے کہ تمام فارمیٹس کے بہترین بلے بازوں میں سے ایک پنت (27) اکتوبر میں ویسٹ انڈیز کے خلاف ہندوستان کی آئندہ ہوم سیریز کے لیے واپسی کا ارادہ رکھتے ہیں۔ اگر ایسا نہیں ہوتا تو اکتوبر نومبر میں آسٹریلیا کے خلاف محدود اوورز کی سیریز کا حقیقی امکان نظر آتا ہے۔ واضح رہے کہ پنت گزشتہ کچھ دنوں سے ممبئی میں طبی ماہرین سے رابطہ میں ہیں ۔ انگلینڈ سے سیدھے یہاں آنے کے بعد انہوں نے اپنے زخمی پیر کی حقیقی صورت حال جاننے کے لیے ٹیسٹ کروائے، سمجھا جاتا ہے کہ شہر کے ڈاکٹروں نے انہیں بحالی کے لیے سی او ای میں واپس آنے کی آخری تاریخ دی ہے۔اینڈرسن ٹنڈولکر ٹرافی کے مانچسٹر (چوتھے) ٹیسٹ کے پہلے دن کرس ووکس کی گیند پر پنت کی ٹانگ پر چوٹ لگ گئی تھی جس سے وہ درد کے عالم میں میدان چھوڑنے پر مجبور ہوئے۔ انجری کے وقت وہ 37 رنز پر بیٹنگ کر رہے تھے۔ اگلے دن سب کو حیران کر کے وہ میدان میں داخل ہوئے اور ٹیم کے لیے کچھ قیمتی رنز جوڑے۔ اس دوران ٹیم کے نائب کپتان پنت نے اپنی نصف سنچری (54) بھی مکمل کی۔تاہم انجری کی وجہ سے انہیں اوول میں کھیلے جانے والے پانچویں اور آخری ٹیسٹ میچ سے محروم ہونا پڑا جسے ہندوستان نے جیت کر سیریز برابر کر دی۔ پنت سیریز ختم ہونے کے بعد انگلینڈ میں ہی رہے اور خیال کیا جاتا ہے کہ وہ کچھ دن پہلے ہی ہندوستان واپس آئے ہیں۔ چوٹ کے بعد سے، پنت اپنے سوشل میڈیا ہینڈلز پر اپنی صحت یابی کے بارے میں اپ ڈیٹس پوسٹ کر رہے ہیں۔