بلڈانہ ،22 نومبر( پریس ریلیز) انسانی برادری کی حیثیت سے ایک انسان پر دوسرے انسان کے کچھ حقوق و فرائض عائد ہوتے ہیں جن سے عہدہ برآہونا ہر مسلمان کا مذہبی فرض ہے۔مثلاًعدل و انصاف ، صداقت و سچائی ، محبت و الفت ،ہمدردی و خیر خواہی، شفقت و مہربانی اور عفو ودرگزر کا مظاہرہ کرنا ۔اسی طرح ظلم و ستم ،جھوٹ و فریب، قہر و جبر اور تنگی وسختی سے معاشرہ انسانی کو پاک و صاف رکھناہمارا قومی ومذہبی فرض ہے۔ اسی لئے جمعیۃ علماء مہا راشٹر کے صدر مولانا حافظ محمد ندیم صدیقی صاحب کی ہدایت کے مطابق پورے صوبے میں اصلاح معاشرہ اورسیرت النبی ﷺ مہم جاری ہے اور صوبے کے الگ الگ حصوں میں پروگرام منعقد کئے جار ہے ہیں۔
چنانچہ جمعیۃ علماء شیگائوں کے زیر اہتمام اور علاقے کے مشہور عالم دین حضرت مولانا مفتی محمد روشن قاسمی صاحب ( جنرل سکریٹری جمعیۃ علماء ودربھ مہا راشٹر ) کی نگرانی میں مندرجہ ذیل پرو گرام منعقد ہوئےگذشتہ دنوں۱۱؍ نومبر بروز جمعہ عیدگاہ مسجد میں جلسہ سیرت النبی و اصلاح معاشر ہ منعقد ہو ا، جس کا آغاز قر آن کریم کی تلاوت اورنعتیہ کلام سے ہوا ، بعدہ مقرر خصوصی حضرت مولانا مفتی انیس الدین صاحب اشرفی پاتوڑاوی( مہتمم دارالعلوم احیاء سنت لوہارہ وقاضی شریعت دارلقضاء شیگاؤں ضلع بلڈانہ ) نے اپنے خطاب میں فرمایا کہ ہمارے عقائد کے درستگی کے بغیر ہماری نجات بھی ممکن نہیں موصوف نے فرمایا کہ معاشرے کو ہر قسم کی خرابیوں اور گندگیوں سے پاک وصاف رکھنا چاہیے اور اگر ساری کوششوں اور اچھائیوں کے باوجود بھی مسائل پیدا ہوجا ئیں تومسلمانوں کو اپنے مسائل شریعت وسنت کی روشنی میں حل کرنا چاہیے،آخرمیں حضرت مولانا نعمت اللہ صاحب حسینی نے خطبہ جمعہ و نماز پڑھا کر دعاء فرمائی۔ایسے ہی ۱۲ نومبر بروز سنیچر بوقت بعد نماز عشاء آزاد نگر شیگاؤں میںسیرت النبی و اصلاح معاشرہ کا اجلاس منعقد ہوا،مقرر خصوصی حضرت مولانا انیس پٹیل صاحب نائب صدر جمعیۃعلماء تحصیل شیگاؤں نے خطاب کرتے ہوئے فرمایا کہ مسلمانوں کو اپنے دلوں سے ڈر اور خوف نکال کر اللہ تبارک و تعالی کی رسی کو مضبوطی سے تھامنے کی ضرورت ہے حضرت مولانا نے فرمایا کہ اپنے بچوں کے ایمان و عقائد کی حفاظت کے لئے مکاتب کے جال کو مضبوط کرنا ضروری ہے اگر ان بچوں کو ایمان کا رنگ لگے گا تو دنیاں کا زنگ نہیں لگے گا موصوف نے نوجوانوں کو نظر بد سے بچنے کی تاکید کی اور پا پندی کے ساتھ نماز پڑھنے کی تلقین فرمائی۔ آخر میں حافظ عابد خان (شہر صدر جمعیۃ علماء شیگاؤں) نے جمعیۃ علماء کی خدمات کو بیان کرتے ہوئے فرمایا کہ جہاں جمعیۃ علماء ملت کے مسائل کو لے کر ہمہ وقت جدوجہد میں لگی رہتی ہے تو وہیںمسلمانوں کے ایمان و عقائد کے اصلاح کی فکر میں بھی ہر وقت ہے مصروف عمل رہتی ہے، موصوف نے نوجوانوں کو جمعیۃکے ساتھ قدم با قدم چلنے کہ نصیحت فرمائی۔ اسی طرح ۱۵ نومبر بروز منگل بعد نماز عشاء مکتب تعلیم الاسلام ودفتر جمعیۃ علماء شیگاؤں میں سیرت النبی و اصلاحی معاشرہ کا اجلاس حافظ محمد تسلیم صاحب صدر جمعیۃ علماء تحصیل شیگاؤں کی صدارت میں منعقدہوا جس کاآغاز حافظ سعید صاحب (جنرل سیکریٹری جمعیۃعلماء شہر شیگاؤں) کی تلاوت سے ہوا ،مقرر خصوصی حضرت مولانا حبیب خان اشرفی صاحب (نائب صدر جمعیۃ علماء تحصیل شیگاؤں)نے اپنے خطاب میں فرمایا کہ آپ صلی اللہ علیہ وسلم کا اتباع کرنا یعنی اپنی زندگی کے ہر عمل میں طریقۂ نبوی کو اختیار کرنا، اپنی ہر خواہش کو شریعت کے تابع کردینا اور عقائد، عبادات، معاملات، اخلاق اور معاشرت میں اپنے آپ کو سنت کے سانچے میں ڈھال لینا یہ ایک مسلمان کا کام ہے۔ حافظ عابد خان صاحب( شہر صدر جمعیۃ علماء شیگاؤں)نےجمعیۃ علماء کی خدمات و قربانیوں کو بیان فرماتے ہوئے فرمایا کہ جمعیۃ علماء ہند کی خدمات کو مسلمان کبھی فراموش نہیں کرسکتے موصوف نے فرمایا کہ روز اول سے لے کر سے آج تک مسلمانوں کے مسائل کو لے کر میدان عمل میں اگر کوئی نظر آتا ہے تو جمعیۃعلماء ہے ،حاضرین کو جمعیۃسے جوڑنے اور جمعیۃ کے کام کو عبادت سمجھ کر کرنے کی اپیل کی ،آخر میں مولانا اکرم بیگ صاحب (خازن جمعیۃ علماء تحصیل شیگاؤں) کی دعاء پر اجلاس کا اختتام ہوا۔
