کیمرون:کوموروس کے وزیرِ خارجہ ایمبے محمد نے جمعرات کو کہا، ان کا ملک اسرائیلی قبضے سے فلسطینی عوام کی رہائی اور جدوجہدِ آزادی کی مکمل حمایت کرتا ہے اور انہوں نے غزہ میں فوری جنگ بندی کا مطالبہ کیا۔
ایمبے محمد نے اقوامِ متحدہ کی جنرل اسمبلی کو بتایا، "اسرائیل کی طرف سے فلسطینیوں کا اندھا دھند قتل غزہ میں اسرائیلی افواج کے ہاتھوں ہونے والی نسل کشی کی خالص ترین شکل ہے جس کی ہم مذمت کرتے ہیں اور اسے ختم کرنے کی فوری ضرورت ہے۔”
انہوں نے عالمی برادری پر زور دیا کہ وہ غزہ پر اسرائیل کی جنگ کو روکنے کے لیے فوری طور پر کارروائی کرے۔ انہوں نے مزید کہا کہ 41,000 سے زائد فلسطینی بشمول خواتین اور بچے جاں بحق چکے ہیں اور انکلیو میں زیادہ تر عمارات اور بنیادی شہری ڈھانچہ مکمل طور پر تباہ ہو چکا ہے۔محمد نے کہا، "ہمارا ملک فلسطینی برادر لوگوں کی مکمل حمایت کرتا ہے اور ہم عالمی برادری سے فوری جنگ بندی اور تیزی سے انسانی امداد کی فراہمی بحال کرنے کے لیے کام کرنے کا مطالبہ کرتے ہیں۔”انہوں نے مزید کہا، کوموروس بھی مقبوضہ مغربی کنارے کی صورتِ حال کو "نہایت تشویش” کی نظر سے دیکھتا ہے کیونکہ وہاں اسرائیلی آباد کار اور فوجی یونٹ فلسطینیوں کے خلاف انتہائی تشدد کا استعمال کرتے ہیں۔
محمد نے کہا، کوموروس فلسطینی علاقوں پر اسرائیل کا قبضہ ختم کرنے کے لیے ایک منصفانہ اور دیرپا حل کی حمایت کرتا ہے جس کی بنیادیں بین الاقوامی قانون اور اقوامِ متحدہ کی متعلقہ قراردادوں میں ہیں۔ ان میں دو ریاستی حل کا مطالبہ کیا گیا ہے جس میں مشرقی یروشلم فلسطین کا دارالحکومت ہو۔انہوں نے مئی میں اقوامِ متحدہ کی جنرل اسمبلی کے اکثریتی ووٹ کو "سراہا” جس میں سلامتی کونسل سے فلسطین کے حقوق و مراعات میں اضافہ کرتے ہوئے اسے اقوامِ متحدہ کی مکمل رکنیت دینے کا مطالبہ کیا گیا تھا۔
محمد جن کا ملک عرب لیگ اور افریقی یونین کا رکن ہے، نے سوڈان میں خانہ جنگی پر کوموروس کی بہت زیادہ تشویش کا اظہار کیا جس میں اقوامِ متحدہ کے اعداد و شمار کے مطابق ہزاروں افراد ہلاک اور تقریباً 10 ملین بے گھر ہو چکے ہیں۔
