واشنگٹن، 17 دسمبر (یو این آئی) امریکی ریاست وسکونسن کے ایک اسکول میں فائرنگ کے نتیجے میں ایک نوجوان نے 2 افراد کو ہلاک کر دیا، جس کے بعد پولیس نے مشتبہ شخص کو جائے وقوع پر مردہ حالت میں پایا۔
ڈان اخبار میں شائع برطانوی خبر رساں ایجنسی ’رائٹرز‘ کی رپورٹ کے مطابق پولیس نے بتایا کہ ریاست وسکونسن کے دارالحکومت میڈیسن میں فائرنگ کے نتیجے میں ہلاک اور زخمی ہونے والوں میں بچے بھی شامل ہیں۔اس سے قبل پولیس نے کہا تھا کہ فائرنگ میں 5 افراد ہلاک ہوئے لیکن بعد میں وضاحت کی کہ معلومات غلط تھیں۔
فائرنگ کا یہ واقعہ ایک نجی ادارے ابیونڈنٹ لائف کرسچن اسکول میں پیش آیا، جہاں کنڈرگارٹن سے بارہویں جماعت تک کے تقریباً 400 طلبہ تعلیم حاصل کرتے ہیں۔
پولیس نے ایک تحریری بیان میں کہا کہ اس واقعے میں 3 افراد ہلاک ہوئے، جن میں مشتبہ حملہ آور بھی شامل ہے جس کی شناخت اسکول کے ایک نابالغ طالب علم کے طور پر ہوئی ہے، جب پولیس پہنچی تو حملہ آور اسکول کے اندر مردہ پایا گیا۔
یاد رہے کہ امریکہ میں ہتھیاروں تک تمام شہریوں کو رسائی حاصل ہے اور اسکولوں یا پبلک مقامات پر اکثر فائرنگ کے واقعات پیش آنا معمول ہے، بعض ملزمان ذہنی تناؤ کے بعد فائرنگ کرکے دوسروں کو ہلاک کرنے کے بعد خودکشی بھی کرلیتے ہیں۔
