بنگلور، (یو این آئی) کرناٹک کے کانگریس لیڈر جے رام رمیش نے کرناٹک کے شیوموگا میں وزیر اعظم نریندر مودی کی ریلی سے قبل ریاست میں اثر انداز ہونے والے متعدد مسائل اٹھائے ۔مسٹر جے رام رمیش نے ‘ایکس’ پر اہم مسائل کو حل کرنے کے لیے مرکزی حکومت سے مدد کی فوری ضرورت پر زور دیا۔ انہوں نے سب سے پہلے کرناٹک میں پانی کے شدید بحران کا مسئلہ اٹھایا جس سے بیشتر تعلقہ متاثر ہوئے ہیں اور خشک سالی سے متعلق فوری امدادی اقدامات کی ضرورت ہے ۔ انہوں نے اس بحران سے نمٹنے کے لیے مرکزی حکومت سے ریاستی حکومت کے ذریعہ طلب کردہ 18172 کروڑ روپے کی امداد کے معاملے پر روشنی ڈالی۔ انہوں نے کرناٹک میں منریگا اسکیم کے نفاذ کے سلسلے میں مودی حکومت کی جانب سے تعاون کے فقدان پر بھی سوالات اٹھائے ۔انہوں نے کہا، ”میں نے اس بحران سے مؤثر طور پر نمٹنے کے لیے مرکزی حکومت سے 18,172 کروڑ روپے کی امداد کے لیے ریاستی حکومت کی درخواست پر روشنی ڈالی ہے ۔ دوسری بات، میں نے کرناٹک میں منریگا اسکیم کے نفاذ کے سلسلے میں نریندر مودی حکومت سے حمایت کی کمی کا سوال اٹھایا ہے ۔انہوں نے اس اسکیم کو توسیع دینے اور مزدوروں کو اجرت کی ادائیگی کے لیے وقت پر فنڈز جاری کرنے پر زور دیا، بالخصوص دیہی معیشت پر خشک سالی کے اثرات کو کم کرنے کے لیے منریگا کے تحت کام کے دنوں کو 100 سے بڑھا کر 150 کرنے کی تجویز پر غور کرنے کی اپیل کی۔ مسٹر رمیش نے ان بھاگیہ اسکیم میں رکاوٹوں پر تشویش کا اظہار کیا اور مودی حکومت پر الزام لگایا کہ وہ ابتدا میں کرناٹک کو چاول فراہم کرنے پر راضی ہوئی تھی لیکن بعد میں فوڈ کارپوریشن آف انڈیا (FCI) کے ذریعے اس سے دستبردار ہوگئی۔ آخر میں انہوں نے کرناٹک میں بی جے پی کے سرکردہ لیڈروں کے خاندانی روابط پر روشنی ڈالی، جیسے راگھویندر یدیورپا، بی جے پی کے سابق وزیر اعلیٰ بی ایس یدیورپا کے بیٹے ، اور وجے ندرا یدیورپا۔ انہوں نے وزیر اعظم سے شیوموگا کے دورہ کے دوران کرناٹک میں خاندانی سیاست کے بارے میں بی جے پی کے موقف کو واضح کرنے کا مطالبہ کیا۔
