محسن الملک ہال میں سالانہ تقریب کا اہتمام

علی گڑھ، 27؍ مئی،سماج نیوز سروس: ’’علی گڑھ مسلم یونیورسٹی اپنی تعلیم و تہذیب اور روایات سے جانی جاتی ہے، جس کا سب سے بہترین اظہار سرسید ڈے اور اقامتی ہالوں میں ہونے والے پروگراموں میں ہوتاہے۔ اس طرح کے پروگراموں کے لیے حسن انتظام کی ضرورت ہوتی ہے جو آپ نے کیا، جس کے لیے آپ قابل مبارکباد ہیں‘‘۔ یہ باتیں اے ایم یو وائس چانسلر پروفیسر نعیمہ خاتون نے محسن الملک (ایم ایم) ہال کے سالانہ تقریب کی صدارت کرتے ہوئے کہیں۔ انہوں نے کہا کہ یونیورسٹی کے عملے کا ہر فرد اور یہاں کی ہر چیز طلباء کی تعلیم و تربیت کے لیے ہے اور میں خود نظام تعلیم و تربیت کو بہتر بنانے کے لیے وقف ہوں۔ وائس چانسلر نے یونیورسٹی کے نظام کو مزید بہتر بنانے کے عندیے کا اظہار کرتے ہوئے کہا’ میری کوشش ہے کہ یہاں زیر تعلیم طلبا کو قیام و طعام میں کسی طرح کی دشواری نہ ہو جس کے لیے اقدامات کیے جا رہے ہیں‘۔ انہوں نے ایم ایم ہال کے پرووسٹ پروفیسر محمد علی جوہر کے حسن انتظام کی تعریف کی۔اس سے قبل ایم ایم ہال کے پرووسٹ پروفیسر محمد علی جوہر نے وائس چانسلر پروفیسر نعیمہ خاتون کا استقبال کیا۔ انہوں نے کہا کہ پروفیسر نعیمہ خاتون، علامہ شبلی اور لطاف حسین حالی کی مشرقی خاتون کی بہترین مثال ہیں، جو مشرقی اقدار کی حامل ہیں۔ انہوں نے کہا کہ ہماری نئی وائس چانسلر یونیورسٹی کے نظام کو جس طرح سے بہتر کرنے کی جانب گامزن ہیں اس سے یہ اندازہ لگانا کوئی مشکل نہیں کہ مستقبل میں طلبا کو بہت سی نئی اور مزید بہتر سہولیات ملنے والی ہیں، جن کا مقصد اس کے سوا کچھ نہیں کہ طلبا کو ایسا ماحول فراہم کیا جائے جس میں وہ اپنے تعلیمی سلسلے پر اپنی پوری توجہ مرکوز کرسکیں۔مہمان خصوصی پروفیسر محمد گلریز نے کہاکہ تعلیم ہی وہ زینہ ہے جو ہمیں کامیابی کی منزل تک پہنچا سکتاہے، اس لیے تین سے چار برس آپ اپنی خواہشات کو مار کر صرف تعلیم کے لیے وقف کردیں پھر زندگی میں کوئی ایسی خواہش نہیں ہوگی جسے آپ پورا نہ کرسکیں۔مہمان اعزازی، ڈائریکٹر، ڈائریکٹریٹ آف اسکول ایجوکیشن پروفیسر اسفر علی خان نے کہا کہ میری یہ خوش قسمتی ہے کہ میں اتنے اچھے پروگرام میں شریک ہوں، آپ طلبا کے درمیان بار بار آنا زندگی کا احساس کراتا ہے۔ آپ نے جس طرح سے بہترین انتظام کیا ہے اس سے اندازہ ہوتاہے کہ آپ کی تربیت درست نہج پر ہو رہی ہے۔ مہمان اعزازی فائننس آفیسر پروفیسر محسن خان نے کہا کہ علم اور عمل سے ہی زندگی بنتی ہے، آپ محنت سے آج اگر علم حاصل کریں گے تو اس کے ثمرات آئندہ زندگی میں دیکھنے کو ملیں گے۔مہمان خاص، کنگ انٹرنیشنل لمیٹیڈ کانپور کے ڈائریکٹر اور اے ایم یو سے فارغ التحصیل مسٹر تاج عالم نے خوشی کا اظہار کرتے ہوئے کہا کہ آج ایسا محسوس ہو رہاہے جیسے اپنی طالب علمی کا دور جی رہا ہوں۔ انہوں نے طالب علمی کے دور کے ساتھ اپنی زندگی کے تجربات کی روشنی میں کہاکہ وقت ضائع کرنے والا ضائع ہوجاتاہے اس لیے خود کو ضائع ہونے سے بچائیں۔ پروفیسر ارشد حسین نے طلبا کو نصیحت کرتے ہوئے کہا کہ زندگی جتنی حسین ہے اس سے کہیں زیادہ بد صورت ہے، اگر آج آپ نے محنت سے تعلیم حاصل کی تو یہ ہمیشہ کے لیے حسین ہوجائے گی لیکن اگر وقت گزاری سے کام لیا تو یہی زندگی بد صورت ہوجائے گی۔تقریب میں متعدد تہذیبی و ثقافتی پروگرام پیش کئے گئے اور طلباء نے اپنے فن کے جوہر دکھائے۔ سینئر ہال مسٹر پرویز خان نے سالانہ رپورٹ پیش کی اور مختلف امتحانات، ملکی سطح پر ہونے والے مقابلوں اور علمی حصولیابیوں پر طلبا کو اعزاز سے نوازا گیا۔ ہال کے متعدد پوسٹ ہولڈروں کو بھی یادگاری نشان دے کر ان کی عزت افزائی کی گئی۔ جنرل وارڈن ڈاکٹر بشیر حسن کے اظہار تشکر کے ساتھ پروگرام اختتام پذیر ہوا۔ اس موقع پر خاص طور پر یہاں کے وارڈن ڈاکٹر منصور عالم صدیقی، ڈاکٹر عطاء الرحمن، سابق سینئر محمد کامران خان،موجودہ سینئر ہال محمد پرویز خان، محمد افتخار خان، شہباز خان، عبدالقدیر، محمددانش وغیرہ موجود رہے۔