بھو پال ۔مرکزی وزیر داخلہ امت شاہ نے اقربا پرستی کو ملک اور جمہوری نظام کے لیے خطرہ قرار دیا ہے۔ اتوار کو مدھیہ پردیش میں 2003-2023 تک کی بی جے پی حکومت کا رپورٹ کارڈ جاری کرتے ہوئے، انہوں نے کانگریس، ایس پی، ڈی ایم کے اور شیو سینا (یو بی ٹی) پر خاندانی سیاست میں ملوث ہونے کا الزام لگایا۔انہوں نے یہ بھی کہا کہ شیوراج حکومت نے مدھیہ پردیش سے ‘بیمارو زمرہ کا ٹیگ کامیابی سے ہٹا دیا ہے۔بی جے پی کے سینئر لیڈر امیت شاہ نے آنے والے اسمبلی انتخابات کے پیش نظر وزیر اعلی شیوراج سنگھ چوہان، ریاستی بی جے پی صدر وی ڈی شرما اور ریاستی وزیر داخلہ نروتم مشرا کی موجودگی میں ریاست میں تقریباً 20 سال کی بی جے پی حکومت کا رپورٹ کارڈ پیش کیا۔ اس دوران شاہ نے کہا کہ وہ کسی کا نام نہیں لینا چاہتے لیکن کئی پارٹیوں کو دیکھ کر خاندان پرستی کا اندازہ لگایا جا سکتا ہے۔ اس نظام میں متعلقہ فریق کا کوئی دوسرا فرد آگے نہیں بڑھ سکتا۔شاہ نے کہا کہ بی جے پی میں خاندان پرستی بالکل نہیں ہے۔ انہوں نے کہا، سابق وزیر اعظم اٹل بہاری واجپائی وزیر اعظم نریندر مودی اور وزیر دفاع راج ناتھ سنگھ کا کوئی سیاسی خاندانی پس منظر نہیں تھا۔ میں پارٹی کا صدر بنا، میرے خاندان میں کوئی بھی سیاست میں نہیں تھا۔ بی جے پی سربراہ جے پی نڈا کے خاندان کا کوئی سیاسی پس منظر نہیں ہے۔ مدھیہ پردیش کے وزیر اعلی شیوراج سنگھ چوہان کا پس منظر کیا ہے؟شاہ نے کہا، مدھیہ پردیش 1956 میں وجود میں آیا تھا اور اس کے بعد کانگریس نے 2003 تک ریاست پر حکومت کی سوائے پانچ چھ سال کے، لیکن ان کے دور حکومت میں ریاست بیمار رہی۔ انہوں نے الزام لگایا کہ بیمارو ریاست کانگریس کی وراثت ہے۔انہوں نے مزید کہا کہ بی جے پی حکومت نے مختلف فلاحی اسکیموں کو نافذ کرکے ریاست کو ترقی کی راہ پر گامزن کیا ہے۔ انہوں نے کہا کہ گزشتہ 20 سال ریاست کے لیے سنہری دور ثابت ہوئے۔ آنے والے سالوں میں مدھیہ پردیش کو ایک ترقی یافتہ ریاست بنانے کے لیے سنگ بنیاد رکھا گیا ہے۔ شاہ نے کہا کہ صحت، صنعتی ترقی، زراعت کے شعبے اور تعلیم کے میدان میں ہم آئندہ 20 سالوں میں ریاست کو خود کفیل بنانے کے لیے کام کریں گے۔انہوں نے دعویٰ کیا کہ مدھیہ پردیش کا شمار اب ملک کی ترقی یافتہ ریاستوں میں ہوتا ہے اور اس کامیابی کے لیے وزیر اعلیٰ چوہان کو مبارکباد پیش کی۔ انہوں نے کہا کہ کانگریس کے دور میں ریاست بجلی، پانی اور سڑکوں سمیت تمام محاذوں پر پیچھے رہ گئی تھی، لیکن بی جے پی حکومت نے ان تمام شعبوں میں زبردست تبدیلیاں کیں۔مرکزی وزیر داخلہ نے کانگریس پر الزام لگایا کہ وہ وزیر اعظم نریندر مودی اور وزیر اعلی شیوراج سنگھ چوہان کے ذریعہ شروع کی گئی پہل اور فلاحی اسکیموں کو بند کر رہی ہے جب وہ اقتدار میں تھے۔ شاہ نے سابق وزیر اعلیٰ اور کانگریس کے موجودہ صدر کمل ناتھ پر بدعنوانی کا الزام لگایا۔ شاہ نے کانگریس لیڈر دگ وجئے سنگھ پر بھی نشانہ سادھتے ہوئے کہا کہ ریاست ان کے دور حکومت میں ہر پہلو، خاص طور پر بجلی، پانی اور سڑکوں میں پیچھے تھی۔ کانگریس کو رپورٹ کارڈ پیش کرنا چاہئے۔بی جے پی کے سینئر لیڈر شاہ نے اپوزیشن کانگریس سے مطالبہ کیا کہ وہ ریاست میں تقریباً 53 سالوں سے حکومت کرنے کا رپورٹ کارڈ دیں۔ انہوں نے کہا کہ ہم نے سیاست میں احتساب کا کلچر متعارف کرایا ہے۔ ہم جہاں بھی اقتدار میں ہیں عوام کو جوابدہ ہیں۔ اعداد و شمار پیش کرتے ہوئے شاہ نے کہا کہ کانگریس نے 2004 سے 2014 کے درمیان 10 سالوں میں مدھیہ پردیش کو صرف ایک لاکھ 98 ہزار کروڑ روپے دیے۔
دوسری طرف مودی حکومت نے صرف نو سالوں میں مدھیہ پردیش کو آٹھ لاکھ 33 ہزار کروڑ روپے مختص کئے۔شاہ نے کہا، مدھیہ پردیش گندم کی برآمدات میں 45 فیصد شراکت کے ساتھ ملک میں سرفہرست ہے۔ ریاست نے 3.62 کروڑ سے زیادہ آیوشمان کارڈ تقسیم کیے ہیں۔ ریاست میں پردھان منتری گرام سڑک یوجنا کے تحت تیار کی گئی دیہی سڑکوں کا معیار ملک میں سب سے بہتر ہے۔ انہوں نے کہا کہ ‘پی ایم آواس یوجنا کے تحت دیہی علاقوں میں گھر بنانے میں ریاست دوسرے نمبر پر ہے اور صفائی اسکیم میں اندور شہر پچھلے چھ سالوں سے پہلے نمبر پر ہے۔شاہ نے کہا کہ 2014 کے لوک سبھا انتخابات میں مدھیہ پردیش کے لوگوں نے بی جے پی کو 29 میں سے 27 سیٹیں دیں، جب کہ 2019 میں انہوں نے ان کی پارٹی کو 29 میں سے 28 سیٹیں دیں۔ شاہ نے کہا، مجھے پختہ یقین ہے کہ ریاست کے لوگ 2024 کے لوک سبھا انتخابات میں یہ باقی ایک سیٹ بی جے پی کو دیں گے۔ 2019 میں، کانگریس کو ریاست کی واحد چھندواڑہ لوک سبھا سیٹ ملی، جسے پارٹی کے سینئر لیڈر کمل ناتھ کے بیٹے نکول ناتھ نے جیتا تھا۔
