نیویارک، (یو این آئی) نیو یارک سٹی کے نومنتخب میئر زہران ممدانی اور ان کی اہلیہ راما دواجی باضابطہ طور پر میئر کی سرکاری رہائش گاہ گریس مینشن منتقل ہوگئے۔ 34 سالہ میئر زہران ممدانی نے اپنی زندگی کے اس نئے مرحلے کا اعلان اپنے سرکاری انسٹاگرام اکاؤنٹ پر کیا، جہاں انہوں نے گریس مینشن کو عوام کا گھر قرار دیتے ہوئے کہا کہ یہ عمارت ہمیشہ نیو یارک کے عوام سے تعلق رکھے گی۔ اپنی پوسٹ میں ممدانی نے لکھا کہ راما اور میں خود کو خوش نصیب سمجھتے ہیں کہ ہم بھی دیگر نیو یارکرز کی طرح شہر کے ایک نئے حصے میں منتقل ہو رہے ہیں، ہم اپر ایسٹ سائیڈ میں ملنے والی خوش آمدید پر شکر گزار ہیں اور گریس مینشن کے مکین بننے پر عاجزی محسوس کرتے ہیں، جو دراصل عوام کا گھر ہے۔ اس موقع پر انہوں نے اہلیہ کے ہمراہ گریس مینشن میں داخل ہوتے ہوئے تصاویر بھی شیئر کیں، جس میں ان کا سامان بھی نئی رہائش گاہ میں منتقل کیا جا رہا تھا۔ زہران ممدانی نے گزشتہ دسمبر میں تصدیق کی تھی کہ وہ اور ان کی اہلیہ سرکاری میئر رہائش گاہ میں منتقل ہوں گے۔ اس سے قبل وہ گزشتہ پانچ برس سے کوئنز میں واقع ایک رینٹ اسٹیبلائزڈ اپارٹمنٹ میں رہائش پذیر تھے، جہاں وہ ماہانہ 2300 ڈالر کرایہ ادا کر رہے تھے۔
